Fyndnustu mínar með partýsýningu í Tjarnarbíói

Þær Lóa Björk Björnsdóttir og Rebecca Scott Lord verða með uppistand í Tjarnarbíói annað kvöld en sýningin ber heitið „The Rebecca & Lóa Show“ og hefst klukkan 20:00.

Sýningin er á vegum uppistandshópsins Fyndnustu mínar sem samanstendur af Lóu Björk og Rebeccu ásamt Sölku Gullbrá. Hópurinn hélt síðast uppistand í mars síðastliðnum þar sem þær fengu til liðs við sig „tvo gaura sem þær þekkja“ en það voru þeir Vilhelm Neto og Stefán Ingvar.

Lóa Björk er útskrifuð af sviðshöfundabraut LHÍ og starfar sem útvarpskona hjá Útvarpi 101 þar sem hún er annar þáttastjórnenda Morgunþáttarins Músli. Rebecca er bandarísk sviðslistakona sem hefur sýnt sýningar á borð við DJ Daddy Issues, Comedy is a Safe Space og Dates with Dudes en hún starfar einnig í Þjóðleikhúsinu.

Röngu megin við 25 ára og geta notað barnamiða í strætó

Lóa Björk og Rebecca segjast vera „röngu megin við 25 ára, geta notað barnamiða í strætó, elska hnífa, stráka og að vera psycho“.  Í samtali við Vísi segir Lóa Björk að uppistandið sé kannski öðruvísi en það sem hefur verið í boði hingað til enda hefur minna farið fyrir stelpum í hinni íslensku uppistandssenu. Það þýði þó alls ekki að sýningin sé síðri. 



„Við ætlum kannski smá að fara út fyrir kassann í þetta skiptið. Við höfum báðar gaman af leikhúsi og við erum bara að gera þetta sjálfar á okkar vegum og okkur langaði að gera eitthvað skemmtilegt,“ segir Lóa Björk sem lofar miklu fjöri.

Hægt er að kaupa miða á uppistandið í gegnum tix.is og er miðaverðið 2900 krónur.