Stuðningsmenn Barca bauluðu á Busquets og Coutinho

Stuðningsmenn Barcelona eru enn hundfúlir yfir hruni liðsins á Anfield á dögunum og leikmenn Barcelona viðurkenna að þeir séu mjög særðir.

Í leiknum gegn Getafe um liðna helgi var meðal annars baulað á Sergio Busquets og Philippe Coutinho vegna frammistöðu þeirra gegn Liverpool í Meistaradeildinni.

„Við vitum af hverju og þetta var ekki auðveldur dagur fyrir neinn. Það vill enginn spila illa og tapa boltanum. Svona gerist og við verðum að vera þakklátir fyrir stuðningsmennina,“ sagði Busquets en Barcelona vann leikinn, 2-0.

Busquets segir að leikmenn Barcelona séu búnir að vera langt niðri eftir 4-0 tapið gegn Liverpool.

„Það var mjög erfitt að rífa sig upp og fara aftur að spila. Sárið minnkar með hverjum deginum en það var risastórt. Við verðum að halda áfram og græða sárið.“