Eyjamenn hafa ekki tapað í Eyjum í úrslitakeppninni í meira en tvö ár

Eyjamenn fá Hauka í heimsókn í kvöld í undanúrslitum Olís deildar karla í handbolta en staðan í einvíginu er 1-0 fyrir Hauka.

Leikur ÍBV og Hauka hefst klukkan 19.00 í Íþróttahúsinu í Vestmannaeyjum en útsendingin Stöðvar 2 Sport frá leiknum hefst klukkan 18.50.

Haukar geta stigið stórt skref í átt að úrslitaeinvíginu með sigri í Eyjum í kvöld en þá þurfa þeir að gera það sem engu liði hefur tekist á móti ÍBV í 747 daga sem er að vinna leik í úrslitakeppninni úti í Eyjum.

Eyjaliðið hefur unnið sex heimaleiki í röð í úrslitakeppninni. ÍBV liðið vann alla fimm leiki sína í úrslitakeppninni í fyrra og svo leik sinn á móti FH í átta liða úrslitunum á dögunum.

Eyjamenn hafa enn fremur unnið þrjá síðustu heimaleiki sína í úrslitakeppninni með samtals 21 marki eða með sjö mörkum að meðaltali.

Eyjamenn töpuðu síðast á heimavelli sínum í úrslitakeppninni í oddaleik í átta liða úrslitunum á móti Val 15. apríl 2017. Síðan eru liðin meira en tvö ár.

Haukaliðið þekkir það reyndar að vinna leik í úrslitakeppninni út í Eyjum þrátt fyrir tvö töp þar í fyrra. Vorið 2016 unnu haukarnir tvisvar út í Eyjum í undanúrslitaeinvígi félaganna.



Síðustu sex heimaleikir Eyjamanna í úrslitakeppni karla í handbolta:

Átta liða úrslit 2018

4 marka sigur á ÍR (22-18) - Markahæstur: Kári Kristján Kristjánsson 6

Undanúrslit 2018

2 marka sigur á Haukum (24-22) - Markahæstur: Sigurbergur Sveinsson 7

2 marka sigur á Haukum (27-25) - Markahæstur: Agnar Smári Jónsson 6

Lokaúrslit 2018

6 marka sigur á FH (32-26) - Markahæstur: Róbert Aron Hostert 7

7 marka sigur á FH (29-22) - Markahæstur: Róbert Aron Hostert 8

Átta liða úrslit 2019

8 marka sigur á FH (36-28) - Markahæstur: Sigurbergur Sveinsson 8