Theodór framlengdi við ÍBV

Theodór Sigurbjörnsson mun leika handbolta með ÍBV næstu tvö árin en hann framlengdi samning sinn við Eyjamenn í gærkvöld.

Theodór hefur verið einn besti leikmaður Olísdeildarinnar síðustu ár en hann er uppalinn hjá ÍBV.

Hornamaðurinn hefur ekkert spilað með ÍBV síðustu vikur vegna meiðsla en hann skoraði 70 mörk í þeim 13 leikjum sem hann spilaði í deildinni á tímabilinu. Hann var hins vegar í lykilhlutverki þegar ÍBV tók alla titlana þrjá síðasta vetur.

ÍBV hefur ekki átt eins góðu gengi að fagna í ár og mun ljúka leik í Olísdeildinni í fimmta sæti og mæta FH í 8-liða úrslitunum. Lokaumferð Olísdeildar karla fer fram í kvöld og spilar ÍBV við Fram í Safamýrinni.