Marca segir Pogba vilja til Real

Paul Pogba vill spila fyrir Real Madrid á næsta tímabili og er umboðsmaður hans þegar farinn að vinna í að koma honum þangað. Þetta segir spænska íþróttablaðið Marca.

Mikið var rætt um mögulegt brotthvarf Pogba á meðan Jose Mourinho var stjórinn á Old Trafford, því þeir áttu í mjög stormasömu sambandi. Ole Gunnar Solskjær er tekinn við stjórnartaumunum, í það minnsta út tímabilið, og hefur frammistaða Pogba batnað til muna.

Manchester United vill líklega ekki selja miðjumanninn en hann var keyptur fyrir metfé sumarið 2016. Pogba er samningsbundinn til 2021 og er ekkert uppsagnarákvæði í honum.

Pogba er um þessar mundir með franska landsliðinu sem mætir Íslandi í undankeppni EM 2020 á mánudagskvöld.