Fjölmiðlar vilja sjá kynlífsmyndbandið af eiganda Patriots

Það er fast sótt að eiganda NFL-meistara New England Patriots, Robert Kraft, þessa dagana eftir að hann var gripinn með buxurnar á hælunum á vændishúsi í Flórída.

Földum myndavélum var komið fyrir á vændishúsinu sem gaf sig út fyrir að vera nuddstofa. Að sögn eru til tvö myndbönd af eiganda Patriots stunda kynlíf á nuddstofunni.

Fjölmargir fjölmiðlar, þar á meðal ESPN og New York Times, hafa sótt það fast að myndböndin verði gerð opinber en Kraft vill að sjálfsögðu ekki sjá það gerast.

Kraft hefur því sett fram þá kröfu við yfirvöld að myndböndin verði ekki gerð opinber.

Mál Kraft er enn í vinnslu en hann hafnaði sáttatillögu frá yfirvöldum fyrr í vikunni. Hann er einn 24 karlmanna sem var handtekinn vegna máls vændishússins.