Sjálfsást eflir systrasamstöðuna

Við Rauðarárstíg reka þær Tinna Sverrisdóttir leikkona og Lára Rúnarsdóttir tónlistarkona griðastaðinn Andagift súkkulaðisetur þar sem þær bjóða upp á fjölbreytta tíma í andlegri iðkun og súkkulaðiserimóníur. Á morgun hefst námskeið Tinnu, GRL PWR KAKÓ, sem standa mun í sex vikur og er ætlað stúlkum á aldrinum 15 til 18 ára þar sem áherslan verður á sjálfstyrkingu og slökun.

Tinna er útskrifuð leikkona úr Listaháskóla Íslands og starfar einnig sem tónlistarkona og leiklistarkennari í Leynileikhúsinu. Hún er einn stofnenda Reykjavíkurdætra og hefur starfað mikið með börnum og unglingum að sjálfseflingu undanfarin ár en árið 2013 var hún kosin bæjarlistamaður Kópavogs þar sem hún ferðaðist í allar unglingadeildir í Kópavogi þar sem hún stóð fyrir námskeiði með áherslu á sjálfseflingu í listsköpun. Tinna stundaði námið Yoga of sound and chocolate árið 2017 í Gvatemala og lærði þar tónheilun og hvernig vinna á með kakóplöntuna í serimónískum tilgangi til að efla slökun og hugleiðslu.

Með mikinn kvíða og sjálfsefa

Aðspurð út í hugmyndina að námskeiðinu segist Tinna hafa hugsað til þess hversu gott hún sjálf hefði haft af slíku námskeiði á sínum yngri árum. „Ég var haldin miklum kvíða, sjálfsefa, óöryggi, fullkomnunar­áráttu og ótta við álit annarra. Ég vissi raunverulega ekkert hver ég var eða hvað ég vildi.

Nú nokkrum árum síðar er áreitið og hraðinn orðinn enn meiri með öllum samfélagsmiðlunum, tækninni, kröfunum og útlitsdýrkuninni svo það er enn brýnni þörf fyrir að ungar stelpur fái rými til að slaka á og öðlist gagnleg tól til þess að efla sjálfsmynd sína og samskipti. Það skiptir mig miklu máli að fá að vinna með stelpum á þessum aldri að sjálfseflingu, sköpun, systrasamstöðu og deila því sem hefur gagnast mér.“

Setningin „Stelpur eru stelpum bestar“ er slagorð námskeiðsins og segir Tinna ætlunina að finna samstöðu og veita hver annarri stuðning inn í það sem þátttakendur eru að kljást við á hverri stundu. „Einnig er áhersla á einfaldleika og leikgleði sem áminningu um að taka okkur sjálfar og lífinu ekki of alvarlega.“

GRL PWR KAKÓ

Tinna lofar að námskeiðið verði stútfullt af alls konar skemmtilegum, einföldum og gagnlegum æfingum sem hjálpa til við að vinna bug á streitu og kvíða í daglegu lífi.

„Hvert skipti hefur sitt þema, eins og hugrekki, sjálfsvirðing, samskipti, slökun og fleira. Við munum gefa okkur tíma til að kynnast, læra að tjá okkur af öryggi, efla sjálfást og mildi og takast á við óttann okkar. Einnig munum við skoða drauma okkar og langanir og læra æfingar sem hjálpa okkur að finna kjark til þess að láta drauma okkar rætast. Skráningin er í fullum gangi en enn eru örfá pláss eftir svo ég hlakka mikið til að skapa eftirminnilegar stundir með þessum flottu stelpum,“ segir Tinna að lokum.

Skráning og frekari upplýsingar: andagift.is/vara/grlpwr