NFL-deildin vill stela yfirmanni NBA-deildarinnar

Samkvæmt heimildum ESPN eru margir eigendur félaga í NFL-deildinni spenntir fyrir því að gera Adam Silver, yfirmann NBA-deildarinnar, að yfirmanni NFL-deildarinnar.

Þó nokkrir eigendur NFL-liða hafa sett sig í samband við Silver og hlerað áhuga hans á því að færa sig yfir í NFL-deildina.

Núverandi yfirmaður NFL-deildarinnar, Roger Goodell, er ákaflega óvinsæll og almennt illa liðinn af stuðningsmönnum liða deildarinnar enda baulað af krafti á Goodell hvar sem hann kemur.

„Ég get bara sagt að ég hef ekkert pælt í þessu. Ég tel mig vera lánsaman að vera í þeirri stöðu sem ég er í dag. Ég elska starfið mitt.“

Silver hefur gert frábæra hluti hjá NBA-deildinni og tekjur deildarinnar stóraukist. Verðmæti félaganna hefur í leiðinni hækkað mikið.

Á sama tíma hefur NFL-deildin aðeins verið að gefa eftir þrátt fyrir góða stöðu. Eigendurnir vilja meira og eru því á eftir Silver.