Vel á annað hundrað nemendur í Íslensku fluguveiðiakademíunni

Íslenska fluguveiðiakademían fer vel af stað og nú þegar eru nemendur Akademíunnar orðnir vel á annað hundrað.

„Já þetta hefur verið virkilega spennandi vetur hjá okkur“ sagði Gunnar Örn Petersen hjá Fish Partner í samtali við Veiðivísi. Fish Partner stofnaði Akademíuna á haustmánuðum og var framboð námskeiða strax hið glæsilegasta. „Þetta hefur verið fjölbreytt, en nú þegar höfum við haldið fluguhnýtingarnámskeið sem uppselt var á og í næstu viku verður einnig húsfyllir þegar um tuttugu manns ætla að læra að smíða stangir hjá Gunnari Ólafssyni“ sagði Gunnar. „Þá hafa FFI viðurkenndir kennarar Akademíunnar kennt tugum byrjenda að kasta flugu“ bætti Gunnar við.

En hverju þakkið þið þessar frábæru viðtökur? „Það er augljóslega eftirspurn eftir fræðslu og það var vöntun á veiðitengdum námskeiðum. Við vorum líka með skemmtilegt og fjölbreytt framboð og eitthvað fyrir alla“ sagði Gunnar. „Svo má vera að fjöldi nemenda aukist verulega það sem eftir er vetrar því við erum að bjóða hópum ýmiss konar sérsniðin námskeið og fræðslu. Þetta eru t.d. veiðiklúbbar innan fyrirtækja og við tökum að okkur kastnámskeið, veiðinámskeið, fluguhnýtingarnámskeið og fleira fyrir þessa hópa.“ bætti Gunnar við.

En er eitthvað laust það sem eftir er vetrar? „Já það er enn hægt að komast á kastnámskeið hjá okkur og svo er mjög spennandi fyrirlestur í næsta mánuði með Nils Folmer Jorgensen þar sem hann ætlar að opinbera leyndarmálið um það hvernig veiðimenn eiga að setja í þann stóra.“