Tæplega milljón manns mættu á leikina á HM

Skipuleggjendur HM í handbolta í Þýskalandi og Danmörku eru í skýjunum með hvernig til tókst enda hafa aldrei fleiri mætt á leiki á HM.

Alls mættu 906.281 á leiki mótsins og það slær mætingarmetið frá HM 2007 sem haldið var í Þýskalandi. Þá mættu 750 áhorfendur á leiki mótsins. Milljónin er handan við hornið.

Fleiri sáu leikina í Þýskalandi eða 537 þúsund. Það sem meira er þá seldust 98,6 prósent miðanna á leikina í Þýskalandi.

„Þessar tölur hafa komið okkur þægilega á óvart. Við erum sérstaklega ánægð með mætinguna á leikina þar sem þýska liðið var ekki að spila,“ sagði Mark Schober, framkvæmdastjóri þýska handknattleikssambandsins.

Hinn umdeildi forseti IHF, Hassan Moustafa, tók í sama streng.

„Þetta er frábært. Ég var líka í München þar sem þýska liðið spilaði ekki og það var samt fullt. Þetta mót fór fram hjá tveimur alvöru handboltaþjóðum,“ sagði Moustafa.