Sveitarstjórnarmenn báðu alþingismenn um veggjöld

Veggjöld! Veggjöld! Þetta voru skilaboðin sem alþingismenn fengu frá sveitarstjórnarmönnum af landsbyggðinni á þingnefndarfundi í dag, en þeir vilja meira fjármagn í jarðgöng og til að malbika sveitavegi. Þetta kom fram í fréttum Stöðvar 2. 

Umhverfis- og samgöngunefnd, með Ara Trausta Guðmundsson sem starfandi formann um þessar mundir, ræðir þessa vikuna við fulltrúa landshlutasamtaka sveitarfélaga um veggjöld. Við sýndum nefndina á fundi með bæjarráði Seyðisfjarðar og fulltrúum Sambands sveitarfélaga á Austurlandi en á undan þeim komu fulltrúar höfuðborgarsvæðsins fyrir nefndina.

„Við vildum ræða við þá um veggjöld, eða gjöld til þess að flýta fyrir framkvæmdum við Fjarðarheiðargöng. Við erum að berjast fyrir Fjarðarheiðargöngum og erum búin að gera það í fjörutíu ár, þakka þér fyrir,“ sagði Aðalheiður Borgþórsdóttir, bæjarstjóri Seyðisfjarðar, eftir fundinn. 

Fulltrúar Norðurlands vestra, þau Unnur Valborg Hilmarsdóttir, framkvæmdastjóri Samtaka sveitarfélaga á Norðurlandi vestra, og Þorleifur Karl Eggertsson, formaður samtakanna og oddviti Húnaþings vestra, færðu þingnefndinni þau skilaboð að meira fé þyrfti í vegi eins og Skagastrandarveg og Vatnsnesveg.

„Norðurland vestra er með eitt hæsta hlutfall malarvega á þessum stofn- og tengivegum á landinu,“ segir Unnur Valborg. 

-Þannig að þið viljið meira malbik? 

„Meira malbik,“ svarar hún. 

Stefnt er að því að Alþingi klári samgönguáætlun eftir tvær vikur en aðalviðfangsefni þingnefndarinnar er að heyra afstöðu sveitarstjórnarmanna til veggjalda. 

Skilaboðin sem Austfirðingar sendu eru að þeir styðja veggjöld. 

„Já, við gerum það, algjörlega.“

-Og þá til þess að fá Fjarðarheiðargöng? 

„Já, meðal annars. Og samgöngubætur í landinu. Það þarf náttúrlega að halda byggð í öllu landinu, ekki satt?,“ svarar Aðalheiður. 

En hver er afstaða fulltrúa Norðurlands vestra til veggjalda? 

„Það er alveg ljóst að það þarf að gera stórátak í samgöngumálum bara á landinu öllu. Auðvitað er enginn hrifinn af auknum álögum, - það segir sig sjálft. En hins vegar ef það verður til þess að við náum að hraða samgönguframkvæmdum þá er það eitthvað sem maður verður að taka jákvætt í. Við getum í raun ekki sagt annað,“ svarar Unnur Valborg.

Á samgönguáætlun næstu fimm ára eru engir fjármunir til að grafa Fjarðarheiðargöng. 

„Nei, við fengum ekki Fjarðarheiðargöng á silfurfati, því miður. En það er einhver svona smáglufa. Við erum alltaf vongóð og hættum ekkert að berjast,“ segir bæjarstjóri Seyðisfjarðar.

Hér má sjá frétt Stöðvar 2: