Kötturinn köttaður og í kjólinn fyrir jólin

Læðan Jasmine, sem nú er búsett í Kattholti, hefur verið í strangri megrun nú fyrir jólin. Hún hefur misst hálft kíló, sem er hlutfallslega ágætt, að sögn Halldóru Snorradóttur, forstöðumanns Kattholts.

Jasmine í allsherjar klössun

„Hún flutti til okkar í september. Og hefur verið í strangri megrun. Jasmine er með sponsor sem styrkir hana um sérstakt megrunarfæði. Hálft kíló er mjög gott hlutfallslega. Hún var 8,4 kíló en er nú komin í 7,8 kíló,“ segir Halldóra og hlær; köttaður og í kjólinn fyrir jólin, svo gripið sé til þekkst talsmáta úr líkamsræktarstöðvum.

Forstöðukonan segir að Jasmine ætti í raun ekki að vera þyngri en fimm kíló, hún sé það lítil. Og nauðsynlegt sé að létta hana því það sé mjög hamlandi fyrir hana bæði hvað varðar alla hreyfingu og þrif að vera þetta feit. En, hún er orðin miklu frískari.

Búið er að setja Jasmine í bað og snyrtingu og þegar blaðamaður Vísis ræddi við Halldóru var hún stödd á Dýraspítalanum í sérstakri tannhreinsun. Halldóra metur það sem svo að Jasmine sé svona 13 ára gömul en kettir verða oft í kringum 16 ára gamlir. Þannig að hún er komin á virðulegan aldur.

Kisurnar í jóladekri og knúsi yfir jólin

„Hún kemur upphaflega frá eldri konu sem fór á hjúkrunarheimili og gat ekki haft hana lengur hjá sér. Þar hefur Jasmine haft það mjög gott en hafði þyngst svona mikið,“ segir Halldóra og ljóst má vera að Jasmine er í miklu uppáhaldi á Kattholti.

Halldóra segir að hún hafi sinn eigi skrifstofustól og sé dugleg að hjálpa til á skrifstofunni, leggst á lyklaborðið og vill taka þátt í að setja upp vaktaplan og annað. „Virkilega gaman að hafa hana hér hjá okkur.“

Hátíðin er að ganga í garð á Kattholti og kominn jólahugur í menn og málleysingja. „Þorskurinn og rækjurnar eru tilbúnar til að sjóða og gefa á aðfangadag. Kisurnar fá jólamatinn eins og við mannfólkið. Þær eru núna bara í jóladekri og knúsi um jólin.“ 

Kattholt fullt

Halldóra segir að hótelið á Kattholti sé orðið fullt. þar eru um 50 til 60 kisur. Svo að auki eru óskilakisur sem eru að leita að heimili.

„Allt eldri kisur. Kettlingarnir eru í fóstri og koma svo aftur til okkar í janúar í heimilisleit til frambúðar. Og svo eru þessar eldri líka að leita að heimilum, gamlar og gigtveikar. Núna fara engar fleiri kisur frá okkur fyrir jólin, og svo óska þær eftir nýjum heimilum. Það gengur vel að finna kisunum ný heimili, minna er um að fólk leiti eftir kettlingi en áður var.“

Mælir ekki með kettlingum í jólagjöf

Halldóra segir að þau á Kattholti fái fyrirspurnir um kettlinga til að gefa í jólagjafir. En, hún mælir ekki með slíku.

„Það gerum við ekki, þetta er svo mikil skuldbinding og við styðjum það ekki að gefa kettlinga í óvæntar jólagjafir. Þetta þarf að vera sameiginleg ákvörðun fjölskyldunnar. Ekki eitthvað sem maður skilar eftir áramótin. Þetta er ákvörðun sem hugsa þarf til enda.