Oslóartrénu komið fyrir á sínum stað

Unnið var að því á Austurvelli í morgun að koma Oslóartrénu fyrir á sínum stað á vellinum.

Tréð verður tendrað á sunnudaginn, fyrsta í aðventu, klukkan 16. Skemmtidagskrá er á Austurvelli í tilefni dagsins og munu Svala og Friðrik Ómar flytja jólalög ásamt hljómsveit. Þá munu jólasveinar stelast í bæinn og syngja og skemmta.

Lúðrasveit Reykjavíkur leikur jólatónlist frá 15:30 en Katla Margrét Þorgeirsdóttir leikkona er kynnir. Dagskráin verður túlkuð á táknmáli.  

Þórdís Lóa Þórhallsdóttir, formaður borgarráðs, felldi Oslóartréð síðastliðinn laugardag á skógræktarsvæði Skógræktarfélags Reykjavíkur í Heiðmörk. Tréð er 14,5 metra langt  sitkagrenitré og um 50 ára gamalt.