Ástandið mjög slæmt á Íslandi á stuttum tíma

Það er mikið spurt um fræðslu, sérstaklega frá unga fólkinu, allt niður í grunnskóla og við höfum verið að halda erindi víðsvegar og þar á meðal í framhaldsskólum á Íslandi. Þar segjum við okkar sögu, gefum öllum armband og segjum lítillega frá verkefnum okkar ,“ segir Andrea Ýr Arnarsdóttir hjá Minningarsjóði Einars Darra en í gær hófst sala á fatnaði þar sem allur ágóði rennur í sjóðinn. Una Hlín Kristjánsdóttir hjá DUTY hannaði flíkurnar.

Minningarsjóðurinn byrjaði að selja armbönd í júní aðeins nokkrum vikum eftir að Einar Darri lést og var það vitundarvakning að sögn Andreu til að vekja athygli á þeim faraldri sem hér geisar hvað varðar lyfsseðilsskyld lyf.

„Þetta er auðvitað heimsfaraldur en ástandið er orðið mjög slæmt á mjög stuttum tíma á Íslandi. Við vildum gefa armböndin til að vekja athygli og skapa umræðu í samfélaginu.“

Hún segir að svo víðáttumikil fræðsla, eins og þau vilja setja í framkvæmd í grunnskólum Íslands, krefjist fjármagns en minningarsjóður Einars Darra vill geta kostað um helming af kostnaði. Til að það gangi eftir þá vonist hún að sem flestir geti lagt þeim lið. Fötin séu á viðráðanlegu verði en gæðin séu virkilega góð.

„Það er lógó framan á vörunum en það er einnig hægt að fá vissar flíkur án lógós. Inni í stöfunum er bleikur himinn en bleikur var uppáhaldsliturinn hans Einars Darra og hann er jú uppi á himnum. Margt smátt gerir eitt stórt og ef maður nær að bjarga einum einstaklingi þá er þetta þess virði.“