Ágæt gæsaveiði í Melasveit

Þrátt fyrir að það sé langt liðið á októbermánuð eru gæsaskyttur landsins iðnar við að sitja fyrir gæsum í ökrum landsins.

Við erum að fá reglulegar fréttir héðan og þaðan af gæsaveiði en mest virðist vera að gerast á vesturlandi og suðurlandi.  Eitt vinsælasta gæsaveiðisvæði vesturlands er í næsta nágrenni við borgina í Melasveit og þar hefur gæsaveiðin verið með ágætum þrátt fyrir að það stefndi í annað.  Það var ekki mikil kornspretta á svæðinu og leit út fyrir að tímabilið færi til spillis en það hefur ræst eitthvað úr því samkvæmt fréttum af Facebooksíðu Iceland Outfitters sem selja leyfi á svæðið.

Hópur sem var þar við veiðar í gær fékk 28 fugla og það hafa borist fréttir af og til þaðan af hópum með sambærilega veiði og stundum meira.  Það virðist ennþá vera nokkuð af fugli á svæðinu svo það gæti vel farið svo að það verði hægt að veiða langt inní nóvember.  Í fyrra fór fugl mjög snemma af Melunum vegna kulda og snjó en sem betur fer virðist spáin ætla að verða gæsaskyttum hliðholl þetta haustið.