Lokahollið í Stóru Laxá með 80 laxa

Stóra Laxá hefur sýnt það enn einu sinni hvað hún getur átt magnaðann lokahnykk með haustveiðinni.

Það er óhætt að segja að það hafi verið gaman hjá þeim sem áttu síðustu tvo dagana í Stóru Laxá á svæðum eitt og tvö en stangirnar fjórar lönduðu 80 löxum á tveimur dögum.  Þessi frábæra veiði á lokasprettinum setur ána í um 650 laxa en staðfesting á lokatölum af öllum svæðum er ekki komin.  Veiðin síðustu vikuna á svæðum eitt og tvö er búin að vera ævintýralega góð en þessi góða veiði er alls ekki óþekkt í ánni eins og við höfum greint frá en hún var þó óvenjulega seint á ferðinni.  Veiði er nú lokið í Stóru Laxá og unnendur hennar þurfa því að bíða eftir næsta sumri til að heimsækja hana aftur og það verður líklega nokkuð sótt í leyfin síðustu dagana 2019 með þeirri von um að svona veiði endurtaki sig.