189 manns ákærðir fyrir árásir í Mósambík

Réttarhöld í máli 189 grunaðra íslamskra öfgamanna sem ákærðir eru fyrir að hafa átt þátt í árásum sem beindust gegn lögreglu og almennum borgunum í Mósambík hófust í dag. Árásirnar eiga að hafa átt sér stað í héraðinu Cabo Delgado í norðurhluta landsins.

Ekki eru einungis Mósambíkar ákærðir í málinu en í hópi þeirra eru einnig Tansaníumenn, Kóngómenn, Sómalir og Búrúndar.

Réttarhöldin fara fram í héraðshöfuðborginni Pemba og eru rúmlega fjörutíu hinna ákærðu konur.

Vilja samfélag byggt á sjaría-lögum

Síðustu tólf mánuði hafa rúmlega fimmtíu manns verið skotnir, orðið fyrir sprengjuárás eða höggnir af íslömskum öfgamönnum sem vilja koma á samfélagi í héraðinu sem byggir á sjaría-lögum.

Fólkið er ákært fyrir röð brota, meðal annars morð, ólöglegan vopnaburð og brot gegn þjóðaröryggi.

Alls voru tólf manns myrtir og fjórtán særðust í árás í Cabo Delgado fyrir tveimur vikum.

Lögum í Mósambík var breytt í apríl síðastliðinn þannig að refsiramminn þegar kemur að brotum gegn hryðjuverkalögum var rýmkaður.