NFL-stjarna hótaði að lemja blaðamann

Besti útherji NFL-deildarinnar, Antonio Brown hjá Pittsburgh, hefur beðið íþróttafréttamann ESPN afsökunar á því að hafa hótað að lemja hann.

Íþróttafréttamaðurinn Jesse Washington skrifaði grein um Brown á dögunum sem fór illa í hann. Þá var hann að tala um samskiptamiðlaútgáfuna af Brown sem þó gefur lítið af sér til fjölmiðla.

Brown henti sér á Twitter eftir að hafa lesið greinina og sendi Washington skilaboð. „Hlakka til að sjá þig bróðir. Verður gaman að sjá hvernig kjálkinn á þér lítur út eftir það,“ skrifaði Brown en hann baðst svo afsökunar á þessu heimskulega tísti í vikunni.

„Þetta var slæm ákvörðun hjá mér. Það er aldrei í lagi að hóta fólki og ég þarf að vera fagmannlegri í minni hegðun,“ skrifaði Brown.

Þetta er í annað sinn sem hann lætur Washington heyra það. Í fyrra skiptið sendi hann blaðamanninum skilaboð á Instagram um að láta sig í friði. Svo útilokaði hann Washington frá Instagram-reikningi sínum.