Guðmundur leiðir vinnu við nýsköpunarstefnu fyrir Ísland

Guðmundur Hafsteinsson, yfirmaður vöruþróunar á Google Assistant, mun gegna formennsku í stýrihópi stjórnvalda um mótun nýsköpunarstefnu fyrir Ísland.

Þetta kemur fram í frétt á veg atvinnuvega- og nýsköpunarráðuneytisins. Þar segir að Guðmundur hafi starfað hjá Google frá árinu 2014 og leitt starf við margar af helstu tækninýjungum fyrirtækisins. Hann er með með MBA gráðu frá MIT og próf í rafmagns- og tölvuverkfræði frá Háskóla Íslands.

Haft er eftir Þórdísi Kolbrúnu R. Gylfadóttur, ráðherra nýsköpunarmála, að á tímum mikilla breytinga sé öflug og kraftmikil nýsköpun í atvinnulífinu forsenda þess að við tryggjum góð lífskjör á Íslandi til framtíðar.

„Guðmundur hefur um árabil verið stjórnandi í leiðandi tæknifyrirtæki á heimsvísu og það er ómetanlegt að fá hans sýn og þekkingu nú þegar að við leggjum á ráðin hvernig árangursríkast sé að takast á við áskoranir framtíðarinnar,“ segir Þórdís Kolbrún.