Ráðherra verði að sjá til þess að dómnum verði ekki áfrýjað

Formaður samtaka heilbrigðisfyrirtækja fagnar dómi héraðsdóms um að fella úr gildi ákvörðun Sjúkratrygginga Íslands um að meina sérfræðilækni um aðild að rammasamningi. Niðurstaðan sé aftur á móti áfellisdómur yfir stjórnsýslunni. Hann kallar eftir samtali við yfirvöld um framtíð heilbrigðisþjónustu á Íslandi.

Héraðsdómur Reykjavíkur felldi í gær úr gildi ákvörðun Sjúkratrygginga Íslands um að hafna umsókn Ölmu Gunnarsdóttur, sérfræðings í háls-, nef-, og eyrnalækningum um aðild að rammasamningi SÍ og sérgreinalækna.

Fleiri íslenskir sérfræðilæknar sem hafa ætlað sér að koma heim til vinnu en verið hafnað um aðild að rammasamkomulaginu og hefur mál Önnu Björnsdóttur, sérfræðings í Parkinsons-sjúkradómnum vakið mikla athygli en Velferðarráðuneytið hafnaði umsókn hennar um aðild, þrátt fyrir að skortur væri á taugalæknum á Íslandi en hún opnaði nýverið stofu hér á landi.

Í kjölfar dómsins í gær sagði Steingrímur Ari Arason, forstjóri Sjúkratrygginga að hann teldi farsælast að áfrýja ekki dómnum. Því er formaður Samtaka heilbrigðisfyrirtækja sammála, en hann á sæti í samninganefnd sérfræðilækna hjá Læknafélagi Reykjavíkur.

„Þetta er nú það sem við vorum búin að leggja upp með, okkar lögfræðingar voru búnir að teikna þetta upp fyrir okkur, að þetta hlyti að fara svona. Við fögnum hins vegar niðurstöðunni og erum afskaplega ánægð með að þetta mál sé komið á hreint og vonum að þetta verði endirinn á þessu máli,“ segir Stefán.

„Það sem er kannski áfellisdómur í þessari niðurstöðu er það að stjórnsýslan hún er ekki að virka sem skyldi. Við verðum að athuga það að þessi samningur er gerður milli viðkomandi læknis og sjúkratrygginga Íslands. Síðan gerist það að ráðherra heilbrigðismála tekur fram fyrir stofnuninni og segir: „Þið brjótið samninginn.“

Samningur rennur úr gildi um áramót

Þetta segir Stefán vera alvarlegt mál. „Við öll í þessu landi við búum við það að samningar sem eru gerðir þeir standa og yfirleitt er í samningum uppsagnarákvæði og menn hefðu getað farið þá leið ef þeir hefðu viljað en það var ekki gert.“

Rammasamningur rennur út eftir þrjá mánuði og óvíst hvað tekur við. Ráðuneytið hefur að sögn Stefáns haft lítið samráð við fagaðila.

„Nú veit ég ekki hvað ráðuneytið er að gera, okkur er haldið eiginlega utan við það. Það var haldinn einn svokallaður samráðsfundur 2. júlí þar sem ráðherra hafði glærusýningu um hitt og þetta en kom ekkert samningnum við. Það er reyndar búið að boða annan viðlíka fund á mánudaginn en engan samningafund og það er slæmt,“ segir Stefán. Tíminn sé runninn út og ef til standi að gera einhverjar meiriháttar breytingar þá krefjist það lengri tíma.

„Núverandi ráðherra hefur talað mjög fjálglega um einhverjar grundvallarbreytingar sem hún telur þörf á. Ég sé það ekki en auðvitað erum við alltaf tilbúin til viðtals, það hefur aldrei staðið á okkur,“ segir Stefán sem kallar eftir auknu samráði við fagaðila.

„Innan ráðuneytisins er verið að vinna að einhverju sem heitir heilbrigðisstefna. Það veit enginn hvað er í þessu plaggi, fagaðilar hafa ekki verið kallaðir að borðinu og við höfum áhyggjur af því. Ef við ætlum að byggja hér upp gott heilbrigðiskerfi þá verður að vera samráð og það verður að vera samtal. Núna held ég að ráðherra verði að sjá til þess að dómnum verði ekki áfrýjað og við tökum upp samtal um góða uppbyggingu á íslensku heilbrigðiskerfi.“