Ætla að borga stuðningsmönnum fyrir að mæta á La Liga leikinn í Bandaríkjunum

Spænska knattspyrnusambandið ætlar að hjálpa stuðningmönnum Girona að komast á heimaleik félagsins sem fer fram í Bandaríkjunum í janúar.

Deildarleikur Katalóníufélaganna Girona og Barcelona 27. janúar næstkomandi mun verða spilaður í Miami í Bandaríkjunum samkvæmt heimildum BBC.

Leikmannasamtökin í spænsku deildinni voru mjög ósátt með þá ákvörðun spænska sambandsins að spila deildarleik utan Spánar og mörgum öðrum þykir óviðeigandi að leikur í LA Liga verði spilaður í öðru landi en Spáni og hvað þá í annarri heimsálfu.

Leikurinn fer fram á Spáni í tengslum við nýjan fimmtán ára samning spænsku deildarinnar við fjölmiðlafyrirtækið Relevent og er markmiðið með þessu að vekja meiri athygli á spænsku deildinni í Bandaríkjunum.

Heimildarmenn BBC í kringum spænska knattspyrnusambandið hafa hlerað mögulega sáttatillögu í þessu máli en hún snýr þó aðallega að Girona liðinu sem er þarna að missa heimaleik.

Óánægjan á Spáni hefur ekki farið framhjá spænska knattspyrnusambandsins sem leitar nú sátta með því að bjóðast til að borga kostnaðinn fyrir stuðningsmenn heimaliðsins sem vilja ferðast til Miami. Þar erum við að tala um ferðalög og uppihald eða allan þann kostnað sem bætist við af því að leikurinn fer fram á Flórídaskaganum en ekki á Íberíuskaganum.

Ársmiðahafar hjá Girona fá 1500 fría flugmiða og gistingu í eina nótt. Þeir sem fara ekki til Bandaríkjanna fá aftur á móti frían miða á útileikinn á móti Barcelona sem fer fram 23. september. Komist ársmiðarhafarnir ekki þangað þá fá þeir einhverja endurgreiðsli eða aflsátt af ársmiðanum sínum.

LA Liga hefur hvorki staðfest það að leikurinn í Bandaríkjunum verði leikur Girona og Barcelona eða að stuðningsmenn fái þetta tilboð en heimildir BBC virðast þó vera nokkuð pottþéttar.