Mesti listaverkaþjófnaður allra tíma fyrir 107 árum

Þennan dag árið 1911 gekk ítalskur maður, Vincenzo Peruggia, inn í Louvre-safnið í París og fjarlægði mynd eftir Leonardo da Vinci, sjálfa Mónu Lísu. Þá var hún ekki jafn fræg og í dag. 

Peruggia var fyrrverandi starfsmaður Louvre-safnsins og sagðist hafa ætlað að hefna Ítalíu vegna misgjörða Napóleons í Napóleonstríðinu. 

Flestir telja það hæpna útskýringu enda benti flest til þess að peningar hefðu stjórnað gjörðum þjófsins. 

Skellt var í lás á safninu í heila viku í kjölfar þjófnaðarins á meðan rannsókn stóð yfir og lögregluþjónar fínkembdu safnið í leit að vísbendingum.

Guillaume Apollinaire, franskt ljóðskáld sem hafði eitt sinn viljað brenna Louvre-safnið til grunna, var fljótlega grunaður um þjófnaðinn og var handtekinn. 

Apollinaire benti hins vegar á vin sinn Pablo Picasso, sem var einnig yfirheyrður, en báðum var síðan sleppt. Leitað var að málverkinu í yfir tvö ár án nokkurs árangurs. Eftir að hafa geymt verkið í kústaskáp í íbúð sinni í tvö ár varð Peruggia óþolinmóður og reyndi að koma því í verð. 

Í nóvember 1913 barst ítölskum listaverkasala bréf þar sem sagt var að Móna Lísa væri í Flórens og fengist í skiptum fyrir lausnargjald. Peruggia var handtekinn stuttu síðar þegar hann reyndi að nálgast peningana sem honum hafði verið lofað. 

Mónu Lísu var í kjölfarið skilað til Louvre-safnsins í París þar sem hún er enn og brosir framan í heiminn bak við skothelt gler.