Leikir í La Liga spilaðir í Bandaríkjunum

Bandaríkjamenn munu geta mætt á leiki í spænsku úrvalsdeildinni í náinni framtíð án þess þó að þurfa að ferðast alla leið til Spánar.

Spænska knattspyrnusambandið hefur gert 15 ára samning við alþjóðlega fjölmiðlarisann Relevent Sports sem hefur meðal annars komið að skipulagningu International Champions Cup æfingamótsins undanfarin sumur.

Í samningnum er kveðið á um að á hverju leiktímabili fari einhverjir leikir spænsku deildarinnar fram í Bandaríkjunum og samkvæmt heimildum spænskra fjölmiðla er stefnt að því að þetta verði framkvæmt í fyrsta sinn á komandi leiktíð.

„NBA lið og NFL lið eru að spila utan heimalands síns svo afhverju ekki La Liga? Það er mikilvægt að þróa vörumerkið okkar,“ segir Javier Tebas, forseti spænsku úrvalsdeildarinnar.

Eins og Tebas vísar til hefur það þekkst á undanförnum árum að leikir í NBA deildinni og NFL deildinni fari fram annars staðar í heiminum og hafa leikir í þessum deildum til að mynda verið spilaðir í Lundúnum.