„Fréttablaðið greindi frá því í síðustu viku að þyrla í eigu suðurkóreska hersins, sem er annarrar tegundar, hefði farist fyrr í mánuðinum,“ segir í svari Ásgeirs.
„Samkvæmt upplýsingum sem Landhelgisgæslan hefur frá Airbus og fleirum virðist ekki vera um eins atvik að ræða og fyrri slys sem tengst hafa bilunum í gírkassa. Við tökum þessu alvarlega og teljum ástæðu til að skoða málið vandlega.“
Í kjölfar fréttar Fréttablaðsins sem Ásgeir vitnar til kom einmitt fram hjá fulltrúum Landhelgisgæslunnar í frétt RÚV að Airbus teldi að ástæðu þess að spaðar losnuðu af herþyrlu í Suður-Kóreu 17. júlí síðastliðinn mætti ekki rekja til gírkassa vélarinnar.
Fréttablaðið hafði bent á að Airbus framleiðir gírkassa í umrædda þyrlutegund sem var kyrrsett um skeið í kjölfar mannskæðs slyss í Noregi 2016.
Óvíst er að hægt sé að treysta upplýsingum Airbus í þessum efnum. Um mánuði eftir að Super Puma þyrla frá Airbus hrapaði í Noregi 29. apríl 2016 gaf Airbus út yfirlýsingu um hugsanlegar orsakir.
Hið rétta var, eins flugslysanefnd í Noregi hafði þá þegar sagt mögulegt og rannsókn nefndarinnar leiddi síðan í ljós, að einmitt málmþreyta í gírkassa var orsök slyssins. Sambærilegur galli varð til þess að Super Puma þyrla hrapaði í Skotlandi árið 2009.
Eins og komið hefur fram í Fréttablaðinu þá lýsir norska flugslysanefndin í lokaskýrslu sinni um slysið 2016 því hvernig Airbus sýndi ónógan samstarfsvilja við rannsóknina.
Eru yfirvöld hvött til að herða reglur um upplýsingaskyldu flugvélaframleiðenda. Þá hefur Airbus verið sakað um hafa leynt upplýsingum eftir slysið í Skotlandi 2009.
Óvíst er hvenær niðurstöður rannsóknar á þyrluslysinu í Suður-Kóreu á dögunum liggja fyrir. Á blaðamannafundi eftir slysið lýstu aðstandendur hermannanna sem fórust strax áhyggjum af því að orsökin yrði aldrei opinberuð þar sem rannsóknin væri alfarið í höndum hersins og án allrar aðkomu flugslysanefndar í landinu.
Landhelgisgæslan gekk í lok maí að „tilboði aldarinnar“ frá þyrluleigusala sínum, Knut Axel Ugland Holding AS, um að taka við tveimur Super Puma H225 þyrlum í stað tveggja eldri véla. Nýju vélarnar eru með gírkassa þeirrar tegundar sem var í þyrlunum sem fórust í fyrrnefndum slysum. Þótt Airbus hafi gert tileknar ráðstafanir telur norska flugslysanefndin að nauðsynlegt sé að hanna gírkassana upp á nýtt.
„Samkomulagið sem gert var við norska fyrirtækið í lok maí felur ekki í sér bindandi leigusamning fyrir Landhelgisgæsluna,“ segir í svari Landhelgisgæslunnar er spurt er hvort halda eigi nýja samningnum til streitu. „Öryggi áhafna okkar og annarra skiptir okkur höfuðmáli og ef skoðunin leiðir í ljós að það er ekki tryggt hefur Landhelgisgæslan öll tækifæri til að slíta samkomulaginu.“
Í ljósi fullyrðinganna um að Airbus og aðrir teldu slysið í Suður-Kóreu hafa orðið með öðrum hætti en slysin í Noregi og Skotlandi óskaði Fréttablaðið eftir því fyrir viku að fá afrit af þeim upplýsingum. Óljóst er hvort orðið verður við því. „Landhelgisgæslan mun skoða beiðni Fréttablaðsins um afrit af samskiptum eins og óskað hefur verið eftir,“ segir í svari upplýsingafulltrúans.
Kærunefnd útlendingamála hefur fellt úr gildi ákvörðun Útlendingastofnunar að vísa hollenskri konu, Mirjam Foekje van Twuijver, úr landi en árið 2016 var hún dæmd í 8 ára fangelsi fyrir stórfelldan fíkniefnainnflutning. Morgunblaðið greinir frá þessu.
