Rekstrarstjóri lítur atvikið alvarlegum augum

„Við tökum þessum tilmælum og lítum þetta atvik alvarlegum augum og bregðumst við í samræmi við það,“ segir Helgi Pálsson, rekstrarstjóri Gámaþjónustu Norðurlands ehf., um eftirlitsskýrslu Vinnueftirlitsins en stofnunin fer fram á umbætur á aðbúnaði starfsfólks.

Vinnueftirlitið heimsótti starfsstöðvar Gámaþjónustu Norðurlands í gær vegna þess að fótur 15 ára unglings festist í pressugámi þegar hann var að störfum fyrir helgi. Eftir að hafa gaumgæft aðstæður krefst Vinnueftirlitið úrbóta af hálfu fyrirtækisins.

„Þetta er í raun yfirsjón hans og hann metur kannski ekki hættuna eins og vera skyldi og fer þarna ofan í [pressugáminn] til þess að ýta á eftir ruslinu ofan í pressuhólfið og á meðan er pressan í gangi. Þá nær hann að klemma fótinn á milli,“ segir Helgi um tildrög slyssins.

Drengurinn marðist á fæti og er skelkaður eftir atvikið. Hann er ekki kominn til vinnu en þegar hann snýr aftur til starfa verður hann settur í önnur störf hjá Gámaþjónustunni.

Yfirsjón og mistök í skipulagi

Helgi talar um yfirsjón og mistök í skipulagi af hálfu yfirmanna þegar hann er inntur eftir viðbrögðum. Hann segir að alla jafna séu tveir starfsmenn á gámasvæðinu á opnunartíma og að minnsta kosti annar þeirra þurfi að vera eldri en 18 ára.

„Í þessu tilfelli eru þeir báðir of ungir en alla jafna er þarna eldri starfsmaður ásamt þá stundum einhverjum yngri. Það er í sjálfu sér í lagi á meðan sá eldri hefur burði til þess að hafa mannaforráð og stýra þeim yngri.“

Það hafi verið yfirsjón og mistök í skipulagi sem hafi orðið til þess að báðir starfsmennirnir hafi verið  yngri en 18 ára á föstudagsvaktinni.

Krafist úrbóta

Í eftirlitsskýrslu Vinnueftirlitsins er farið fram á útbætur af hálfu Gámaþjónustunnar. Annars vegar er farið fram á að Gámaþjónustan endurskoði áhættumat fyrir vinnu á gámasvæðinu, vinnu við pressugáma og vinnu barna og unglinga og hins vegar er vinna barna og unglinga undir 18 ára við pressugáma og önnur hættuleg tæki bönnuð.

„Vinna barna og unglinga við gámasvæði Akureyringa við Réttarhvamm er bönnuð nema þau starfi með fullorðnum eða þeim sem náð hefur 18 ára aldri,“ segir í skýrslunni.

Aðspurður segir Helgi að hann velti því fyrir sér hvort nægjanlega vel hefði verið staðið að kynningu á þessum þáttum fyrir starfsmönnum.

„Við erum strax byrjuð að taka á því,“ bætir Helgi við.

Lögreglan með málið í skoðun

Jónas Halldór Sigurðsson, staðgengill yfirmanns rannsóknardeildar Lögreglunnar á Norðurlandi eystra, segir að málið sé í skoðun en að kæra hafi ekki borist lögreglu með formlegum hætti.