Eystri Rangá að fyllast af laxi

Eystri Rangá átti ekkert sérstakt tímabil í fyrra en miðað við gang mála við bakkann þessa dagana er ljóst að áin er í fínum málum.

Það hefur verið feykna góð veiði í ánni og síðasta vika skilaði 515 löxum á land og það er ekkert lát á veiðinni samkvæmt því sem við heyrum af bökkum hennar.  Það hafa verið afskaplega góðar göngur síðustu daga og eins og veiðimenn þekkja af henni getur lax verið að ganga í hana af krafti langt fram á haust.  Heildarveiðin í fyrra var ekki nema 2.143 laxar en hún þarf bara nokkra daga í viðbót með sambærilegum veiðitölum til að ná því og þá er allur ágústmánuður eftir en hann er yfirleitt lang besti tíminn í ánni.

Þegar áin er ekki lituð er veiðin í henni á þessum tíma mjög góð og flestir sem veiða á flugu eru að veiða á túpur.  Málið er að síðan hafa margir fræknir fluguveiðimenn verið að prófa að nota hitch og veitt eingöngu á flotlínu og þeim hefur gengið afskaplega vel.  Það er ekki svo að það sé verið að setja neitt út á að veiða með sökkenda, það er bara svo leiðinlegt og lýjandi að kasta þungum sökkenda og túpum allann daginn.