Akademían býður þúsund manns að gerast meðlimir í von um aukna fjölbreytni

Kvikmyndaakademían, sem stendur fyrir afhendingu Óskarsverðlaunanna, hefur boðið tæplega þúsund manns frá 59 löndum að gerast meðlimir. Þetta kemur í kjölfar nokkurra ára gagnrýni á akademíuna, en hvítir karlmenn hafa lengi verið í miklum meirihluta innan hennar.

Akademían bauð 928 einstaklingum í kvikmyndaiðnaðinum að gerast meðlimir akademíunnar í von um að auka fjölbreytni innan hennar, en gangist allir við boðinu mun hlutdeild kvenna fara úr 28 prósentum í 31 og hlutfall þeirra sem eru af hvítum uppruna minnka um 3 prósent. Þá yrði heildarfjöldi meðlima rúmlega sjö þúsund.

Meðal þeirra sem fengu boð um að ganga til liðs við akademíuna voru grínistinn og „Girls Trip“-stjarnan Tiffany Haddish og uppistandarinn Dave Chappelle.

Þetta er ekki í fyrsta sinn sem akademían bregst við gagnrýni um einsleitni, en árið 2016 gáfu þau út loforð um að tvöfalda hlutdeild kvenna og minnihlutahópa innan akademíunnar fyrir árið 2020.