Varað við hafís nærri landi

Landhelgisgæslan varar sjófarendur við hafís nærri landi en TF-SIF, flugvél Gæslunnar, hélt í eftirlitsflug út fyrir Vestfirði í dag til að kanna stöðu hafíss við landið.

Staðfesti leiðangurinn að hafís er óvenju nærri landi. Næst var ísinn 12,5 sjómílur norður af Hælavíkurbjargi en leiðangurinn staðfesti ískort og gervitunglamyndir frá dönsu veðurstofunni sem höfðu gefði slíkt til kynna.

Telur Landhelgisgæslan ástæðu til þess að vara sjófarendur við þessari óvenjulegu nálægð hafíss við Ísland, að því er segir í tilkynningu frá Gæslunni.