Spilar á móti pabba sínum næsta vetur

Jón Arnór Sverrisson ætlar að spila með Njarðvík í Domino´s deild karla í körfubolta á næsta tímabili og er því kominn aftur til síns æskufélags.

Njarðvíkingar segja frá þessu á heimasíðu sinni en Jón Arnór er 20 ára leikstjórnandi og hefur unnið marga titla með yngri flokkum Njarðvíkur.

Jón Arnór spilaði með Keflavík og 1. deildarliði Hamars á nýloknu tímabili en Hamarsliðið fór alla leið í úrslit um laust sæti í Domino´s deildinni þar sem liðið tapaði fyrir Breiðabliki.

Í 1. deildinni var Jón Arnór með 10,5 stig, 6,0 stoðsendingar og 5,5 fráköst að meðaltali í 24 leikjum með Hamarsliðinu.

Sverrir Þór Sverrisson, faðir Jóns Arnórs, tók við karlaliði Keflavíkur á dögunum, en Jón Arnór ætlar ekki að spila fyrir pabba sinn þar heldur ákvað að fara aftur í Njarðvík þar sem hann mun spila fyrir Einar Árna Jóhannsson.

Einar Árni tók við Njarðvíkurliðinu í þriðja sinn á dögunum og hann hefur verið duglegur að kalla unga leikmenn aftur heim í Ljónagryfjuna það sem af er vori.