Axel velur kvennalandsliðið fyrir fjóra leiki í sumar

Axel Stefánsson hefur tilkynnt hvaða leikmenn verða í A-landsliði kvenna fyrir leikina gegn Tékklandi og Danmörku í undankeppni HM. Ísland er með eitt stig eftir fyrstu fjóra leikina.

Leikið er gegn Tékklandi 30. maí á heimavelli áður en haldið verður til Danmerkur þar sem liðið spilar við Dani í Horsens 2. júní.

Liðið mun ekki halda heim á leið eftir leikina við Dani heldur spila tvo æfingarleiki við Japan í Danmörku þann 4. og 5. júní.

„Síðasti heimaleikur okkar í undankeppni EM á móti Slóveníu var lærdómsríkur fyrir stelpurnar okkar. Liðið okkar er að mörgu leyti mjög ungt og það var frábært fyrir alla að upplifa góða stemmningu í Laugardalshöll og ná í okkar fyrstu stig gegn frábæru liði þó svo að við hefðum að sjálfsögðu kosið sigur,” segir Axel í samtali við heimasíðu HSÍ.

„Það er stígandi í leik liðsins og framundan er spennandi verkefni á heimavelli. Við ætlum að halda áfram að þróa okkar leik og trúum því að með góðum stuðningi af pöllunum getum við landað sigri gegn sterku liði Tékka."

„Ég hvet alla til að mæta í Laugardalshöll þann 30. maí og sýna stelpunum okkar stuðning í verki, það skiptir okkur gríðarlega miklu máli.”

Hópurinn í heild sinni:

Andrea Jacobsen, Fjölni                             

Arna Sif Pálsdóttir, Debreceni DVSC                

Díana Dögg Magnúsdóttir, Valur                        

Ester Óskarsdóttir, ÍBV                             

Elín Jóna Þorsteinsdóttir, Haukar                

Eva Björk Davíðsdóttir, Ajax Köbenhavn            

Guðný Jenný Ásmundsdóttir, ÍBV                     

Hafdís Renötudóttir, SönderjyskE                      

Helena Rut Örvarsdóttir, Byåsen                

Hildigunnur Einarsdóttir, Hypo                          

Hrafnhildur Hanna Þrastardóttir, Selfoss                

Karen Knútsdóttir, Fram                              

Lovísa Thompson, Grótta                            

Perla Ruth Albertsdóttir, Selfoss                    

Ragnheiður Júlíusdóttir, Fram                        

Stefanía Theodórsdóttir, Stjarnan                

Steinunn Björnsdóttir, Fram                

Steinunn Hansdóttir, Horsens HH            

Thea Imani Sturludóttir, Volda                                

Þórey Anna Ásgeirsdóttir, Stjarnan            

Þórey Rósa Stefánsdóttir, Fram