Eldur í klæðningu Perlunnar

Slökkvilið hefur verið kallað út vegna elds í klæðningu utan á einum af hitaveitutönkum Perlunnar. Búið er að rýma bygginguna og verður Perlan ekki opnuð aftur í dag. Engin slys urðu á fólki.

Allt tiltækt slökkvilið er á staðnum og hefur allt starfsfólk slökkviliðsins á höfuðborgarsvæðinu verið kallað út. Eldur er á milli þilja í einum af tönkum byggingarinnar en hann er tómur. Á að setja þar upp stjörnuver eftir því sem Vísir kemst næst en heildarkostnaður við sýninguna er um tveir milljarðar króna. 

Voru iðnaðarmenn að störfum í tanknum þegar eldurinn kom upp. Ljóst er að tjónið er mikið þar sem bæði reykurinn sem og vatnið sem dælt er inn til að slökkva valda tjóni á tanknum og inni í Perlunni.

Birgir Finnsson, aðstoðarslökkviliðsstjóri slökkviliðsins á höfuðborgarsvæðinu, segir í samtali við fréttastofu að eldurinn hafi líklegast kraumað þarna í einhvern tíma áður en slökkviliði kom á vettvang.

Ekki er mikill eldur en mikinn reyk leggur frá tanknum. Hefur slökkviliðið áhyggjur af því að eldurinn geti breiðst út þar sem erfitt er að komast að vegna járnklæðningarinnar utan á Perlunni.

Búið er að rífa eina plötu af utan á tankinum þar sem slökkviliðsmenn sprauta vatni inn. Þá eru reykkafarar inni í tanknum auk þess sem einnig er unnið ofan frá á þaki byggingarinnar.

Birgir segir slökkviliðið leggja áherslu á það að verja bygginguna og koma í veg fyrir að eldurinn breiðist út. Um mjög erfitt verkefni er að ræða.

Hér fyrir neðan má sjá myndir frá vinnu slökkviliðsins á vettvangi.

Fréttin var uppfærð klukkan 16:40.