Góðar göngur af vorlaxi á Írlandi

Fréttir berast nú af laxveiði bæði í Skotlandi og á Írlandi og samkvæmt fyrstu tölum gæum við átt vin á góðu í íslensku ánum í sumar.

Veiðitölur úr írsku ánum eru með því besta sem hefur verið í 15 ár og í einhverjum ánum í Skotlandi er greinilega meiri ganga núna en hefur verið síðustu fimm ár.  Í Skotlandi er rétt að greina frá því að þessi aukning virðist þó ekki skila sér í árnar af sama mæli þar sem ósinn er í nálægð við stórar eldisstöðvar og er greinilegt að nærvera þeirra við gönguleið laxsins og þá sér í lagi seiðanna þegar þau fara til sjávar að spila þar inní.

Samkvæmt veiðifréttum frá nokkrum írskum veiðivefmiðlum hefur laxinn verið að koma vel haldinn úr hafi og meira af vænum fiski í aflanum en oft áður en það sem veiðimenn vel að merkja taka þó fyrst eftir er að það er meira af laxi að ganga en áður og þá merkjanlega síðustu 20 ár.  Virðist þetta gefa til kynna að fæðuframboð sé gott í hafinu á uppeldisstöðvum laxsins.  Nú styttist óðfluga í að veiðin hefjist hér á landi en aðeins um tveir mánuðir eru í að tímabilið hefjist svo þessar fréttir hljóta að ylja aðeins undir væntingum fyrir komandi sumar hér á landi.