Sport

Miðnæturkeppni hjá Anníe Mist, Söru og Katrínu Tönju í kvöld og allt í beinni

Óskar Ófeigur Jónsson skrifar
Anníe Mist Þórisdóttir, Katrín Tanja Davíðsdóttir og Ragnheiður Sara Sigmundsdóttir.
Anníe Mist Þórisdóttir, Katrín Tanja Davíðsdóttir og Ragnheiður Sara Sigmundsdóttir. Crossfit Games
Öll augu crossfit heimsins verða á Íslandi í kvöld en þá kemur í ljós hvernig fimmta æfingaröðin lítur út í opinni keppni heimsleikanna.

Íslensku crossfit dæturnar Anníe Mist Þórisdóttir, Katrín Tanja Davíðsdóttir og Ragnheiður Sara Sigmundsdóttir munu keppa innbyrðis í kvöld í höfuðstöðvum Crossfit Reykjavík og fer keppnin fram á mjög óvenjulegum tíma eða eftir miðnætti.

Tilefni keppni þeirra að þessu sinni er að í kvöld verður æfingaröðin í fimmta hluta opnu keppni heimsleikana í crossfit kynnt á Íslandi. Dave Castro, yfirmaður heimsleikanna, er staddur á Íslandi og er það mikill heiður fyrir íslensk crossfit að þetta sé gert hér á landi.



Opna mótaröðin er undanfari svæðiskeppninnar þar sem crossfit fólkið mun á endanum vinna sér keppnisrétt á heimsleikunum í crossfit sem fara fram í Madison í Bandaríkjunum í ágúst.

Það er öllum frjálst að taka þátt í opna hlutanum og yfir 600 íslenskir karlar og yfir 600 íslenskar konur ákváðu að vera með í ár.

Tuttugu efstu frá Evrópu í opna hlutanum komast í svæðiskeppnina þar sem íslenska fólkið verður í norður-Evrópu riðlinum. Það munu fimm efstu konurnar, fimm efstu karlarnir og fimm efstu liðin síðan komast áfram á heimsleikana.





Búist er við að mörg hundruð þúsund manns muni fylgjast með beinni netútsendingu frá Crossfit Reykjavík í kvöld en áður en kemur að keppni þeirra Anníe Mist, Söru og Katrínar Tönju þá fær crossfit fólk heimsins tækifæri til að velja milli þriggja mögulegra æfingaraða.

Tilnefningarnar verða gefnar út klukkan þrjú á Kyrrahafstíma eða klukkan tíu í kvöld að íslenskum tíma. Tveimur tímum síðar mun  Dave Castro síðan segja frá hvernig fimmta æfingaröðin muni líta út og strax í kjölfarið keppa þær Anníe Mist Þórisdóttir, Katrín Tanja Davíðsdóttir og Ragnheiður Sara Sigmundsdóttir í henni.





Það verður því miðnæturkeppni hjá þeim Anníe Mist, Söru og Katrínu Tönju í kvöld og þetta verður allt í beinni á netinu. Viðburðurinn í Crossfit Reykjavík í kvöld verður sendur út á fésbókinni sem og á heimasíðu heimsleika Crossfit.

Anníe Mist, Katrín Tanja og Ragnheiður Sara hafa allar náð frábærum árangri í crossfit síðustu ár,  Anníe Mist og Katrín Tanja hafa báðar unnið heimsleikana tvisvar sinnum og Sara hefur verið í toppbaráttunni og meðal fjögurra efstu undanfarin þrjú ár.

CrossFit

Mest lesið


Fleiri fréttir

Sjá meira


×

Mest lesið