Segir það blasa við að lögreglan þurfi að ræða við Sunnu Elvíru vegna „Skákmálsins“

Dómsmálaráðuneyti Íslands hefur sent yfirvöldum á Spáni formlega réttarbeiðni þess efnis að lögreglan á Íslandi taki yfir rannsókn á máli Sunnu Elvíru Þorkelsdóttur sem liggur slösuð á sjúkrahúsi í borginni Malaga á Spáni. Grímur Grímsson, yfirlögregluþjónn á höfuðborgarsvæðinu, greinir frá þessu í samtali við Vísi en rætt var við hann um málið á vef Ríkisútvarpsins fyrr í dag. 

Utanríkisráðuneytið sendi frá sér yfirlýsingu í síðustu viku þess efnis að íslensk lögregluyfirvöld hefðu leitað eftir samstarfi við spænsk yfirvöld vegna rannsóknar á máli Sunnu Elvíru sem slasaðist þegar hún féll niður af svölum á heimili sínu á Malaga 17. janúar síðastliðinn. Þar kom fram að lögmaður Sunnu Elvíru hefði spurst fyrir um hvort íslensk stjórnvöld gætu ábyrgst að Sunna Elvíra yrði til taks hér á landi meðan málið er til rannsóknar. Gerði lögmaðurinn það í tengslum við kröfugerð sem hann hefur uppi fyrir spænskum dómstólum um að vegabréfi Sunnu verði skilað.

Í yfirlýsingu utanríkisráðuneytisins kom fram að þeirri málaleitan hefði verið vísað til umfjöllunar í dómsmálaráðuneytinu. 

Beiðnin send vegna „Skáksambandsmálsins“

Grímur Grímsson segir í samtali við Vísi að dómsmálaráðuneytið hefði sent þessa formlegu réttarbeiðni, sem er byggð á grundvelli samninga sem báðar þjóðir eiga aðild að, til yfirvalda á Spáni í síðustu viku. Er hún send vegna rannsóknar á málinu sem nefnt hefur verið „Skáksambandsmálið“, en eiginmaður Sunnu er grunaður um aðild að því máli.

Sunnu Elvíru hefur verið haldið í ótímabundnu farbanni á Spáni vegna rannsóknar málsins á Spáni en Grímur segir þessa réttarbeiðni ekki beint varða það að fá þessu farbanni aflétt. 

„Heldur er það augljós afleiðing af því að ef málið verður rannsakað á Íslandi þá verði ekki ástæða til að halda henni í farbanni á Spáni,“ segir Grímur. 

Mannréttindabrot að rannsaka á tveimur stöðum

Hann segir það blasa við að lögreglan á Íslandi þurfi að ræða við Sunnu Elvíru, enda hafi lögregluyfirvöld hér á landi óskað eftir því að rannsóknin á málinu flytjist heim. Hann segir það hefðbundið fyrirkomulag að ef yfirvöld í tveimur löndum eru með sama mál til rannsóknar að rannsóknin verði alfarið á öðrum staðnum. 

„Það er á skjön við mannréttindi ef verið að rannsaka sömu atburði gegn sömu einstaklingum á tveimur stöðum.“

Hann segir ómögulegt að segja til um hvort spænsk yfirvöld verði við þessari beiðni og þá hvenær. „Við stjórnum ekki ferðinni í þessu.“

Reglan á Íslandi að tilkynna grunuðum sem fyrst um stöðu þeirra

Fréttastofa Stöðvar 2 fullyrti í síðustu viku að Sunna Elvíra væru grunuð um aðild að fíkniefnasmygli milli Spánar og Íslands og væri þess vegna í ótímabundnu farbanni. Þegar það var borið undir Sunnu Elvíru af fréttastofu Stöðvar 2 svaraði Sunna því að hún hefði ekki fengið tilkynnta hvaða stöðu hún hefur í þessu máli og neitaði allri vitneskju um það.

Grímur segir í samtali við Vísi að hann geti aðeins tjáð sig um hvernig lögreglan á Íslandi starfar og þar sé reglan sú að ef viðkomandi sé grunaður um eitthvað þá á hann rétt á að vita það eins fljótt og mögulegt er, líkt og lög um meðferð sakamála kveða um.

 „En ég þekki ekki réttarfar á Spáni til að geta sagt til um þessar aðstæður.“

Eiginmaðurinn handtekinn við komuna til landsins

Eiginmaður Sunnu Elvíru, Sigurður Kristinsson, var handtekinn á Spáni um miðjan janúar síðastliðinn vegna gruns um ofbeldisbrot gegn Sunnu. 

Honum var sleppt úr haldi þar ytra að loknum yfirheyrslum og svo handtekinn við komuna hingað til lands í lok janúar. Sigurður var handtekinn við heimkomuna frá Málaga í lok janúar og var úrskurðaður í vikulangt gæsluvarðhald vegna gruns um aðild að umfangsmiklu fíkniefnamáli. 7. febrúar síðastliðinn var hann úrskurðaður í fjögurra vikna langt gæsluvarðhald vegna málsins. Sigurður og annar maður eru í haldi vegna málsins en alls hafa fjórir setið í gæsluvarðhaldi í tengslum við það en tveimur þeirra hefur verið sleppt. 

Fyrst var greint frá málinu í kvöldfréttum Stöðvar 2 fyrir um fimm vikum. Var þá sagt frá því að sérsveit ríkislögreglustjóra hefði farið í aðgerðir í húsnæði Skáksambands Íslands en fíkniefnin komu til landsins í stórum skákmunum. Starfsmenn Skáksambandsins eru þó ekki taldir tengjast málinu. 

Sagðist enga aðild hafa að málinu

Sunna tjáði sig um málið í kvöldfréttum Stöðvar 2 í síðustu viku en þar sagðist hún ekki hafa sent skákmunina sem fylltir voru eiturlyfjum á Skáksambandið og segir kortayfirlitin sín bera með sér að eiginmaðurinn hennar hafi ekki notað hennar greiðslukort til að greiða fyrir sendinguna. 

„Ég get bara sagt hér og nú að það er flökkusaga. Ég átti engan þátt í þessari sendingu og veit ekki hvaðan þessi saga hefur sprottið. En hún er á engum rökum reist,“ sagði Sunna.