Heilsu Hinriks prins, eiginmanns Margrétar Þórhildar Danadrottningar, hefur hrakað mjög á síðustu dögum. Af þeim sökum hefur krónprinsinn Friðrik ákveðið að halda aftur heim til Danmerkur en hann hafði ætlað sér að vera við setningu Vetrarólympíuleikanna í Seúl í Suður-Kóreu.
Frá þessu er greint í tilkynningu frá dönsku konungshöllinni sem send var út í morgun. Danskir fjölmiðlar hafa ekki fengið nánari upplýsingar um líðan Hinriks eða hver næstu skref verða.
Að sögn greinanda danska ríkisútvarpsins er þó ljóst að málið er alvarlegt. Krónprinsinn flýti sér ekki heim úr opinberum heimsóknum nema að tvísýnt sé um heilsu föður hans.
„Þetta er í fyrsta skipti sem konungshöllin sendir frá svo kvíðvænlegar upplýsingar um ástand Hinriks prins,“ er haft eftir greinandanum.
Hinrik var lagður inn á ríkissjúkrahúsið í Kaupmannahöfn í lok janúarmánaðar þar sem hinn 83 ára gamli prins hefur verið undir smásjá lækna.
Í tilkynningu frá höllinni, sem send var út 2. febrúar, var greint frá góðkynja æxli sem fundist hafði í vinstra lunga prinsins. Hann hafi undanfarna daga sætt meðferð til að sporna við lungasjúkdómum.
Ætla má, í ljósi tilkynningar dagsins, að komið hafi bakslag í meðferðina.
Heilsu Hinriks hrakað hratt
Tengdar fréttir
Hinrik prins segir eiginkonu sína hafa haft sig að fífli
Hinrik prins er harður á því að vilja ekki láta grafa sig við hlið eiginkonu sinnar, Margrétar Þórhildar Danadrottningar, í Hróarskeldu.
Hinrik prins þjáist af elliglöpum
Opinberum verkefnum prinsins mun fækka í kjölfar greiningar læknanna.
Hinrik prins lagður inn á sjúkrahús
Eiginmaður Margrétar Þórhildar Danadrottningar hefur verið lagður inn á Rigshospitalet í Kaupmannahöfn.
