Þjálfarinn var „neikvæður“ og „kom sökinni á aðra“

Spánverjinn Ricardo Gonzalez var rekinn sem þjálfari Skallagríms í Domino´s-deild kvenna skömmu eftir undanúrslit Maltbikarsins fyrr í þessum mánuði þar sem að Skallarnir töpuðu fyrir botnliði Njarðvíkur.

Augljóst var að ekki var allt með felldu innan Skallagrímsliðsins en leikhléin í undanúrslitaleiknum voru átakanleg og kom fáum á óvart þegar að sá spænski fékk að taka pokann sinn nokkrum dögum síðar.

Mest áberandi var hvað þjálfaranum og besta leikmanni liðsins, Carmen Tyson-Thomas, kom illa saman. Daginn eftir tapið gegn Njarðvík í undanúrslitunum var Tyson-Thomas mætt til að styðja sína gömlu félaga í úrslitaleiknum á móti Keflavík verandi enn þá leikmaður Skallagríms eins og Vísir greindi frá.

Jóhann Björk Sveinsdóttir, leikmaður Skallagríms, opnar sig um stöðu mála í viðtali í Morgunblaðinu í dag og viðurkennir að margt hafi gengið á innan herbúða liðsins eins og sást í beinu útsendingunni á RÚV.

„Það höfðu verið erfiðleikar, samskiptaerfiðleikar, bæði milli þjálfara og stjórnar, og þjálfara og leikmanna. Þetta var bara allur pakkinn og það var mikið búið að reyna á alla,“ segir Jóhanna Björk.

Neikvæðni þjálfarans var það sem fór mest í taugarnar á leikmönnum liðsins sem situr í sjötta sæti Domino´s-deildarnnar en Skallarnir fóru í undanúrslit Íslandsmótsins á síðsutu leiktíð.

„Ég hugsa að það hafi aðallega verið mikil neikvæðni. Hann hafði líka sína kosti, það má ekki gleyma því. En við misstum svolítið trúna. [...] Það er ekki bara hægt að koma öllu á hann, en neikvæðnin skein svolítið í gegn og hann var fljótur oft að koma sökinni á aðra,“ segir Jóhanna Björk Sveinsdóttir.

Ari Gunnarsson, fyrrverandi þjálfari Vals, var ráðinn í stað Spánverjans.