Ronaldo tæpur fyrir El Clásico

Það ríkir enn óvissa um hvort Cristiano Ronaldo verði með í stórleiknum gegn Barcelona á Þorláksmessu. Hann gat ekki æft með liði Real Madrid í dag.

Madridingar æfðu í morgun venju samkvæmt og þar var enginn Ronaldo líkt og síðustu daga. Hann var til hliðar að æfa einn síns liðs og gat ekki beitt sér af krafti.

Portúgalinn meiddist á kálfa á úrslitaleik HM félagsliða í Abu Dhabi og hefur ekki enn náð sér.

Real Madrid er ellefu stigum á eftir Barcelona og verður að vinna leikinn til þess að hreinlega eygja von um að geta varið titil sinn á Spáni.

Leikurinn verður í hádeginu á Þorláksmessu og er í beinni á Stöð 2 Sport.