Jólagjöfin sem hitti í mark var Nokia 3310

Aðeins eitt var á óskalista Guðfinns Einarssonar, Bolvíkings og liðsmanns Karlakórsins Esju, þessi jólin. Nokia 3310 sími en hugmyndin kviknaði eftir óvæntan hitting í Kringlunni sökum snjallsímaleysis gamals kunningja.

„Ég vann hjá Símanum Kringlunni á yngri árunum, á gullaldartíma gamla Nokia 3310. Þá keyptu nánast allir þennan síma enda langbestu kaupin í honum. Einhverju síðar kom svo delúx útáfan, Nokia 3410 sem var með lithium rafhlöðu. Þá vorum við sko að tala saman!.... Lengi!“ segir Guðfinnur spurður um tengsl sín við símann. 

Græjuna sem var á hverju heimili fyrir fimmtán árum en fáir hafa séð síðan Apple og Samsung tóku yfir markaðinn. Það gæti þó breyst eftir að ákveðið var að framleiða símann á nýjan leik og er hann því fáanlegur hverjum sem vill í dag.

„Fyrir nokkrum vikum hitti ég félaga minn, en sá hafði stuttu áður tapað iPhone símanum sínum. Hann sat á fjölförnum stað og var að bíða eftir fjölskyldunni. Hann sat uppréttur og virti fyrir sér umhverfið, en í kringum hann grúfði fólk sig yfir snjallsímaskjái. Sem er líklega eina ástæða þess að við sáum hvor annan,“ útskýrir Guðfinnur.

Í óspurðum fréttum tók vinur hans upp glænýja Nokia 3310 símann sem hann hafði keypt sér. 

„Hann lýsti svo fyrir mér útópískum raun-veruleika, sem var samt eitthvað svo kunnuglegur frá því fyrir ekkert svo löngu síðan. Og benti svo á rafhlöðumerkið sem stóð í 30% á fjórða eða fimmta degi.“

Guðfinnur segist vera orðinn mun háðari snjallsímanum en hann langi til að vera. 

„Svo þegar kom að þessu ómögulega verkefni, velja jólafjöf fyrir fullorðna, þá var Nokia 3310 sími það eina sem ég óskaði mér. Það var því mjög ánægjulegt að sjá hann koma upp úr einum pakkanum.“

Systir Guðfinns og mágur voru gleðigjafarnir sem gáfu honum símann. Tækið uppfyllir allar hans væntingar.

„Hann er lítill, fisléttur og passar vel í alla vasa. Hann er þess vegna hin fullkomna græja í sparifötin fyrir jólaboðin. Hann kemur með einhverjum internet möguleikum sem ég ætla að forðast að kynna mér, en horfi frekar á þessa helstu aldamótarfídusa. Þar trónir Snake auðvitað á toppnum.“ 

Það hafi tekið eina til tvær tilraunir að rifja upp reglurnar en eftir það hafi vöðvaminnið tekið við.

„Ég er pottþétt orðinn bestur í hverfinu,“ grínast Guðfinnur. „Það var líka gríðarleg nostalgia að nota takkaborðið til þess að senda fyrsta sms-ið.“

Hann efast um að nýi síminn eigi eftir að leysa snjallsímann alveg af hólmi. 

„En þetta verður til þess að hann fær verðskuldaða pásu af og til. Svo er þetta auðvitað eini síminn sem kom upp úr pökkunum þessi jólin sem fólk mun í alvörunni vilja fá að sjá og prófa.“

Hann lofar fylgjendum sínum á samfélagsmiðlum að það sé laust við flugeldamyndir þessi áramótin. 

„En ég verð heldur ekki að berjast um hleðslutækið upp úr Skaupi.“

Veistu um skemmtilegar sögur af jólagjöfum þetta árið? Segðu okkur söguna í ummælakerfinu hér að neðan eða sendu okkur línu á ritstjorn@visir.is.