Byssukúlur og maríjúana fundust í bíl Jackson

Bíll í eigu NFL-leikmannsins DeSean Jackson hafnaði á tré á aðfangadagskvöld og ökumaðurinn flúði af vettvangi. Í bílnum fundust byssukúlur og maríjúana.

Áreksturinn átti sér stað í Tampa en Jackson spilar með Tampa Bay Buccaneers. Byssukúlurnar sem fundust eru löglegar í Flórida og kannabisið var það lítið að líklega fengi eigandinn aðeins sekt fyrir vörslu þess.

Jackson segist ekki hafa verið að keyra bílinn og segist geta sannað það. Hann hefur greint lögregluyfirvöldum frá því hvaða vinur hans hafi verið undir stýri.

NFL-leikmaðurinn neitar því að eiga efnið sem fannst í bílnum.