Courtois frestar endurnýjunarviðræðum við Chelsea

Thibaut Courtois, markmaður Englandsmeistara Chelsea, gæti verið á leið frá félaginu. Samningur hans við Chelsea rennur út eftir 18 mánuði en hann vill fá nýjan samning, hvort sem hann verður við Chelsea eða eitthvað annað félag, fyrir lok þessa tímabils.

Courtois frestaði viðræðum um endurnýjun við Englandsmeistarana nýlega, en hann er að íhuga að snúa aftur til Spánar. Hann var hjá Atletico Madrid á láni árin 2011-14. Þar kynntist hann spænskri kærustu sinni sem hann á með tvö börn. Þau slitu sambandi sínu fyrr á þessu ári og flutti hún aftur til Spánar með börnin.

„Þetta er ekki auðvelt. En ég hafði séð það fyrir að hún myndi snúa aftur til Madrid,“ sagði Belginn.

„Ég elska börnin mín og þegar ég sakna þeirra velti ég því stundum fyrir mér hvort ég ætti ekki að spila á Spáni á næstu árum. Þess vegna vil ég taka mér tíma í að taka ákvörðun um endurnýjun á samningnum.“

Hann sagði líklegast að endurnýjun við Chelsea verði niðurstaðan þar sem hann sé mjög ánægður hjá enska félaginu, en Evrópu- og Spánarmeistarar Real Madrid hafa verið sagðir hafa áhuga á markverðinum.