Komu í veg fyrir tilræði gegn forsætisráðherra Bretlands

Tveir íslamskir öfgamenn voru handteknir á Bretlandi í síðustu viku en þeir eru grunaðir um að hafa lagt á ráðin um að ráða Theresu May forsætisráðherra af dögum. Sky-fréttastofan segir að samsærismennirnir hafi ætlað að skjóta heimatilbúinni sprengju að Downing-stræti og myrða May í glundroðanum sem skapaðist.

Forstjóri MI5, leyniþjónustu Bretlands, á að hafa greint bresku ríkisstjórninni frá samsærinu í gær vegna þess hversu alvarlegt það var.

Lögreglan í London segir að mennirnir tveir hafi verið ákærðir fyrir hryðjuverkabrot og að þeir komi fyrir dómara í dag. Mennirnir eru sagðir 20 og 21 árs gamlir, sá yngri frá norðurhluta London en sá eldri frá suðausturhluta Birmingham.

Talsmaður forsætisráðherrans vildi ekki tjá sig um samsærið þegar Reuters-fréttastofan falaðist eftir því.