Treystum á vísindamennina og tæknina til að segja um hvað sé að gerast í jöklinum

Óvissustigi almannavarna vegna Öræfajökuls verður viðhaldið að minnsta kosti til þriðjudags. Veruleg óvissa er um framhald þeirrar atburðarásar sem nú er í gangi í jöklinum en sérfræðingar og vísindamenn reyna að ráða í hvað sé að gerast.

Allt hefur verið með kyrrum kjörum við Öræfajökul ef frá eru taldir nokkrir smáskjálftar við Hvannadalshnúk frá því í gærkvöldi.  Vísindamenn frá Veðurstofunni og Jarðvísindastofnun Háskóla Íslands hafa í dag unnið úr gögnum sem sótt voru í tveimur ferðum í og við jökulinn í gær.

Upplýst var að nýr sigketill hafi myndast í jöklinum en öflugur jarðskjálfti var þar í byrjun október. Ákveðið var í gærkvöldi að viðhalda óvissustigi almannavarna á svæðinu og mun litakóði vegna flugumferðar í grennd við jökulinn verða áfram gulur.

Ljóst er að verulegur jarðhiti er kominn upp í öskju Öræfajökuls en ekki eru nein merki um að eldgos sé að hefjast. Þó er veruleg óvissa um framhald þeirrar atburðarásar sem nú er í gangi. Fylgjast þarf náið með henni og auka eftirlit og rannsóknir. Bæta þarf mælanetið vegna jarðhitans og fram að því verður lögregla og sérfræðingar með vakt við jökulinn.

„Þeir eru með færanlegt eftirlit. Þeir eru þarna við staðinn. Þeir voru með punktastöðu fyrst en eru núna þarna við staðinn og eru að aðstoða vísindamenn við það að taka sýni og fleira á svæðinu,“ sagði Hjálmar Björgvinsson, aðstoðaryfirlögregluþjónn hjá almannavarnadeild Ríkislögreglustjóra.

Samkvæmt upplýsingum er en mikil brennisteinslykt við Kvíá, þar sem talið er að jarðhitavatn úr katlinum, sem seig, hafi komið niður.

Jarðvísindamenn vinna að því að yfirfara nýjar gervihnattarmyndir af jöklinum og munu fulltrúar almannavarna og veðurstofunnar meta stöðuna klukkan níu í kvöld.

Lögreglan á Suðurlandi ásamt heimamönnum vinnur að rýmingaráætlun á svæðinu. Nýlegt hættumat fyrir svæðið segir að frá því að eldgos í jöklinum nái til yfirborðs og þar til flóð væri komið að þjóðvegi 1, gætu í mörgum tilfellum liðið aðeins um 20 mínútur.

Í Öræfum er þónokkur byggð og vinsælir ferðamannastaðir innan þessa svæðis.

„Auðvitað er maður ekkert rólegur því að þetta er svolítið óvenjulegt og það eru mörg mörg mörg hundruð ár síðan gaus þarna síðast og hvað gerist núna veit maður ekki. Ég vil nú frekar draga úr því og við sjáum hvað setur. Tæknibúnaður og annað er miklu miklu betri heldur en við höfum átt undanfarna áratugi. Þannig að maður leggur allt traust á vísindamennina okkar sem að geta svarað þessu,“ segir Hjálmar.