Við hestaheilsu en búinn að kaupa legsteininn

Bjarni Bernharður Bjarnason, ljóðskáld og myndlistarmaður, hefur gengið frá pöntun á legstein sínum. Legsteinninn hefur raunar verið hannaður og bíður Bjarni þess nú að hann verði sendur á heimili hans, eftir viku.

Bjarni greinir frá þessu á Facebook-síðu sinni þar sem hann segir legsteininn loks fullhannaðan.

„Sérdeilis er hann flottur,“ segir Bjarni en á honum má sjá dúfu.

„Ég setti þessa dúfu inn á steininn, sem getur táknað heilagan anda eða staðið sem friðartákn, það skiptir ekki máli,“ segir Bjarni. Þá standa á steininum fleyg orð, „Sjálfs sín sporgöngumaður á veginum endalausa.“ Hann segir grafskriftina þýða að hann hafi trúað á eigin sannfæringu. Vegurinn endalausi standi fyrir „eilífðina“.

Listamaðurinn, sem fagnar 67 ára afmæli sínu þann 3. desember, segist hafa gengið frá greiðslu fyrir steininn. Það hafi komið honum á óvart hve ódýr hann var.

„Steininum verður ekið heim til mín eftir viku - tíu dag og mun þá taka stöðu sína á stofugólfinu í híbýlum mínum, uns sá dagur rennur upp að anda mínum þóknast að hafa vistaskipti,“ segir Bjarni og þakkar Bergsteini legsteinum í Kópavogi fyrir viðskiptin.

En af hverju að fjárfesta í legsteini, verandi á besta aldri?

„Það er ekki vegna þess að ég sé að búast við snöggum dauða, ekki frekar en eðlilegt þykir,“ segir Bjarni í samtali við Vísi. Hann segist vera við góða heilsu þó að enginn viti hvenær lokakallið komi. Ástæðan er önnur.

„Ég vil gjarnan hafa eitthvað um þetta að segja sjálfur. Ég tel mig vera ábyrgan mann og vill taka ábyrgð á sjálfum mér út fyrir gröf og dauða. Ég vil ekkert leggja þetta í hendurnar á börnunum mínum,“ segir Bjarni.

Þá segir hann einnig að honum finnist lítið koma til hinna hefðbundnu hvítu krossa sem sjást á leiðum í kirkjugörðum víða um land. Bjarni vill fá aðeins veglegri minnismerki um sjálfan sig.

„Ég vildi reisa sjálfum mér svolítið veglegri stein með tilheyrandi áletrun sem ég taldi hæfa minni persónu. Það getur vel verið að börnunum mínum, ég þekki nú mitt heimafólk, þeim hefði kannski verið trúanlegt til að láta spýtukrossinn nægja en það yrði ég ekkert sáttur við,“ segir Bjarni hlæjandi að lokum.