Segir að ekki hafi verið brugðist nægilega við ásökunum um óæskilega hegðun sundþjálfara

Formaður Sundssambands Íslands segist sjá eftir því að að hafa ekki brugðist betur við ásökun um óæskilega hegðun sundþjálfara á sínum tíma. Afrekskona í sundi sem lýsir brotum þjálfarans gegn sér er ekki sú eina sem hefur kvartað undan framkomu hans.

Í Fréttablaðinu í dag sagði Hildur Erla Gísladóttir frá grófu ofbeldi sem hún var beitt af sundþjálfaranum sínum þegar á árunum 2007 og 2008 þegar hún æfði með sundfélagi Hafnarfjarðar. Hún var aðeins 16 ára gömul þegar þjálfarinn áreitti hana fyrst. Þau voru tvö ein í bíl þar sem hann hafði boðist til þess að keyra hana heim eftir æfingu. Hann var þá 52 ára.

Þjálfaranum tókst að brjóta Hildi Erlu niður með áreitni og kynferðislegu ofbeldi sem versnaði næstu mánuði, þangað til hún loksins þorði að segja frá. Hildur kærði manninn en hann var aldrei dæmdur fyrir brot sín. Aldrei náðist að taka skýrslu af honum þar sem hann fór úr landi eftir að málið kom upp. Hann viðurkenndi brot sín þó fyrir formanni sundfélags Hafnarfjarðar.

Hörður Oddfríðarson, formaður Sundsambands Íslands, segir að þegar atvikið hafi komið upp hafi verið til verkferlar til að vinna eftir. „Þeir eru í dag öðruvísi en þeir voru þá og það er líka ljóst að við fórum ekki nákvæmlega eftir þeim á þeim tíma,“ segir Hörður en þjálfarinn hafði áður verið tilkynntur til sundsambandsins fyrir óæskilega hegðun.

„Við ræddum saman ég og þáverandi formaður Sundfélagsins í Hafnarfirði og ég veit að hann átti samtal við þennan þjálfara. Þetta kemur svo ofan í seinna og eftir á að hyggja má segja að við hefðum átt að bregðast öðruvísi við,“ segir Hörður.

Hann segir að nú sé unnið að því að skerpa verkferla. „Ef það kemur upp kvittur af ofbeldi af einhverju tagi er gripið inn í strax,“ segir Hörður og bætir við að haft yrði samband við allra foreldra og rannsókn sett af stað.

Hörður útskýrir að í þrígang hafi verið haft samband við sundsambandið frá sundfélögum að utan með fyrirspurnir um störf þjálfaras hér á landi. „Ég hef í öllum tilfellum bent á það að það kom upp mál sem varðar misbeitingu í hans störfum hér og bent viðkomandi á að hafa samband við félagið sem hann starfaði hjá þannig að þeir fengju þá upplýsingar frá fyrstu hendi.“

Hörður segir að kvörtun Hildar sé eina kvörtunin sem hafi borist sambandinu, er lítur að kynferðisofbeldi, á þeim tíma sem hann hefur starfað sem formaður eða í 11 ár. „Ég er alveg klár á því að þetta er ekki einsdæmi. Mikil þöggun hefur verið um þessi mál,“ segir Hörður og bætir við að það sé ánægjulegt að Hildur hafi stigið fram og vonar að það hjálpi öðru íþróttafólki.