Bassaleikari Marilyn Manson sakaður um nauðgun

Jessicka Addams, söngkona hljómsveitarinnar Jack Off Jill, hefur sakað Twiggy Ramirez, bassaleikara Marilyn Manson, um nauðgun.

Addams greindi frá þessu á Facebook-síðu sinni.

Hún og Ramirez hófu samband á tíunda áratug síðustu aldar, þegar hún var átján ára gömul. Þegar það hafði staðið yfir í nokkurn tíma fór Ramirez að beita hana ofbeldi. Hún segir frá því hvernig það afbrýðisemi hans hafi leitt til þess að hann sló hana ítrekað.

Hún segir Ramirez hafa heimsótt hana í íbúð vinar þeirra, Pete, þegar Ramirez var í fríi frá tónleikaferð með hljómsveitinni Nine Inch Nails.

„Hann neyddi mig á gólfið með því að taka mig hálstaki. Ég sagði NEI. Ég sagði NEI. Ég sagði það svo hátt að Pete kom í herbergið og dró hann af mér. En þá hafði mér verið nauðgað. Mér var nauðgað af einhverjum sem ég hélt að ég elskaði.“

Hún segist ekki hafa þorað að segja frá þessu opinberlega í mörg ár af ótta við að það myndi hafa áhrif á feril hennar.

Marilyn Manson sendi frá sér yfirlýsingu vegna málsins til Pitchfork þar sem hann sagðist hafa vitað af sambandi Jessicky og Ramirez en hann hafi ekkert heyrt af þessum ásökunum fyrr en nýlega og sagðist hryggur yfir því sem hún hefur þurft að ganga í gegnum.