N1 harmar að myndin af konunni hafi birst á auglýsingaskilti

Persónuvernd hefur úrskurðað um að birting N1 hf. af einstaklingi og bifreið hennar í auglýsingu hafi ekki samrýmst ákvæðum laga nr. 77/2000, um persónuvernd og meðferð persónuupplýsinga. Persónuvernd bars kvörtun frá konu þann 19. ágúst síðastliðinn vegna notkunar á mynd af henni í auglýsingu frá N1. Kvörtunin beindist að N1 hf og Íslensku auglýsingastofunni en auglýsingin birtist á auglýsingaskilti í Flugstöð Leifs Eiríkssonar og einnig í auglýsingabæklingum Icelandair.

Sögðu auglýsingastofuna bera ábyrgð

Í viðbótargögnum sem Persónuvernd fékk frá konunni kom meðal annars fram að greina megi númer bifreiðar konunnar á myndunum. N1 var boðið að koma á framfæri skýringum vegna kvörtunarinnar og barst Persónuvernd svarbréf frá fyrirtækinu 26. september 2016. Þar segir að kvörtuninni sé ranglega beint að félaginu þar sem Íslenska auglýsingastofan teljist bæði ábyrgðaraðili og vinnsluaðili.

Þann 21. desember 2016 bárust Persónuvernd frekari skýringar frá N1 um að það hefði komið í ljós að ákveðinn misskilningur átti sér stað á milli Íslensku auglýsingastofunnar og N1 hf. Fólst hann meðal annars í því að nota átti myndina í minni upplausn en birtist í auglýsingunni í Leifsstöð, þannig að ekki væri hægt að greina einstaka persónur á myndinni. Ekki var gert ráð fyrir því að myndin yrði notuð í auglýsingar eða með þeim hætti að hægt væri að persónugreina einstaklinga á myndinni. 

N1 tók ábyrgð á birtingu myndarinnar og harmaði misskilninginn. Kom þar einnig fram að myndin hafi verið tekin úr notkun og fjarlægð úr gagnagrunni N1 strax eftir að konan hafði samband.

Staðfest að konan samþykkti ekki birtingu

Í kjölfarið var farið yfir ferla, skráningu mynda og allar viðeigandi tæknilegar og skipulagslegar öryggisráðstafanir til að koma í veg fyrir að mistök sem þessi geti átt sér stað. Samkvæmt lögfræðingi N1 átti N1 umrædda mynd í sínum myndabanka og lét auglýsingastofuna fá hana til þess að útbúa auglýsinguna.

Í úrskurði Persónuverndar kemur meðal annars fram að N1 hafi átt umrædda mynd og telst þar af leiðandi vera ábyrgðaraðili. Staðfest er að ekki lá fyrir samþykki kvartanda fyrir birtingu myndarinnar og birting N1 á ljósmynd af konunni og bifreið hennar samrýmdist því ekki lögum um persónuvernd og meðferð persónuupplýsinga.

„Þótt áhöld séu uppi um hvort unnt sé að persónugreina kvartanda á hinni umþrættu mynd, leiðir  af framangreindu að ljósmyndir af bifreiðum, þar sem skráningarmerki eða önnur auðkenni sjást, sem gera þær rekjanlegar til eiganda og eftir atvikum ökumanns, teljast til persónuupplýsinga í skilningi laga nr. 77/2000. Þá telur Persónuvernd ekki tilefni til að víkja frá ákvæðum laganna á grundvelli 5. gr., þar sem um er að ræða mynd sem notuð var í þágu markaðssetningar.“