Íslensk útgáfa af sænskum rappsmelli

Gucci Song með sænska rapparanum Michel Dida fær á morgun sérstakt íslenskt remix þar sem þau Jóhanna Rakel, Jóhann Kristófer og Birnir bæta við það sem sænskir frændur vorir voru búnir að byggja. Gucci Song hefur verið frekar vinsælt lag í Svíþjóð í sumar.

Lagið er úr smiðju Trans94, umboðsskrifstofu og útgáfufyrirtækis í Svíþjóð. Hópurinn sér m.a. um sænsku tónlistarmennina Silvönu Imam, sem kom fram á tónlistarhátíðinni Iceland Airwaves í fyrra, fyrrnefndan Michel Dida, Erik Lundin og Cherrie en sú síðastnefnda vann til verðlauna á sænsku Grammi-verðlaunahátíðinni árið 2016 fyrir R&B og hipphopp-plötu ársins.

„Það er heiður að vera í sambandi við þetta gengi. Trans94 eru svolítið mikið búnir að vera að gera svona remix-verkefni og fleira – það var að koma út heimildarmynd um Silvana Imam og bók sem heitir Third Culture Kids sem fjallar um krakka sem hafa alist upp í öðrum menningarheimi en foreldrar þeirra koma úr. Þetta er bara nett gengi.

Michel Dida er mjög flottur. Síðast þegar hann gerði svona stórt remix var það lagið Höru Mej Bae sem varð risastórt á Norðurlöndunum. Það kom remix með stelpum eingöngu – Zara Larsson er til dæmis með í því. Gucci Song hefur fengið remix með sænskum göturöppurum og Dida vildi gera spes remix með íslenskum röppurum – þeir eru búnir að fylgjast með senunni hérna heima og finnst það náttúrulega mjög spennandi og því lá alveg beint við að gera eitthvað feitt hérna heima, þannig að Jóhann, Jóhanna Rakel og Birnir negldu niður vers. Þetta er allt bara mjög spennandi, þetta eru stærstu og virtustu rappararnir í Svíþjóð í dag, myndi ég segja,“ segir Logi Pedro Stefánsson, einn af heilunum bak við verkefnið.

Er eitthvað fleira svona á leiðinni frá ykkur? 

„Þetta er partur af stærra samstarfi sem við Les Freres Stefson erum búnir að vera að setja upp. Við höfum verið að vinna með röppurum í Danmörku, á Írlandi og svo í Svíþjóð núna. Við erum búnir að að fá til Íslands danska rapparann Emil Stabil – hann kom á Airwaves og svo fengum við hann aftur á MR-ball – við erum líka að vonast til að hann komi og spili aftur í haust. Sama máli gegnir um Unge Ferrari sem er norskur rappari – hann spilaði á Airwaves og svo MR-ballinu. 

Síðan er það írskt band sem er að koma á Airwaves sem heitir Hare Squead sem við linkuðum upp með þegar við vorum að spila í Brighton og væbuðum með. Við fengum þá til að koma á Airwaves og vonandi í stúdóið. Þeir eru búnir að taka þátt í einu Sturlu Atlas lagi sem kemur vonandi út í haust. Þetta band hefur til dæmis gert lag með Goldlink og er að fá sturlaða spilun. Það er bara gaman að þessi frábæra íslenska sena sé ekki bara að gera hipphopp sem er vinsælt hérna heima heldur í raun samkeppnishæft úti í heimi.“

Lagið Gucci Song „Reykjavík remix“ kemur á streymisveituna Spotify á morgun.