Skugga Sveinn í fánalitunum hjá Geysi

Íslenska merkið Geysir frumsýndi á föstudagskvöldið haust- og vetrarlínu sína Skugga-Sveinn í gamla Héðinshúsinu í Reykjavík. 

Um svokallaða "see now, buy now" sýningu var að ræða þar sem allur fatnaðurinn á sýningunni var komin í verslanir Geysis um allt land strax daginn eftir. 

Erna Einarsdóttir, yfirhönnuður Geysis, segir fatnaðinn vera innblásinn af íslensku konunni og hennar hversdagslífi í borginni, með sterkum vísunum í íslenskan lista- og menningarheim en þetta er fjórða fatalína Ernu fyrir Geysi. Þessi lína sækir nafn sitt í hið þekkta leikverk Skugga-Svein með skírskotun í leiktjöld sem máluð voru af Sigurði málara Guðmundssyni fyrir fyrstu uppsetningu verksins árið 1862.

Við skulum skoða þetta einstaklega litríku línu sem hentar vel inn í vetrartískuna framundan. Djúpir rauðir tónar, dökkbláir og hvítir einkenna línuna en heiðblá köflótt ullarkápa stal senunni á pallinum. 

Ásamt eigin hönnun býður Geysir upp á vörumerki á borð við A.P.C., Ami, Stine Goya, Ganni, Henrik Vibskov, Gosha Rubchinskiy, Wood Wood, Hope, Soulland, Carven, Veja, Hanro, Carla Colour og Harmony í verslunum sínum.