Björgvin Páll reyndi fyrir sér sem leikstjórnandi er FH vann Hafnafjarðarmótið

FH stóð uppi sem sigurvegari Hafnafjarðarmótsins sem er eitt af undirbúningsmótunum fyrir Olís-deild karla í handbolta. FH tryggði sér sigur á mótinu með jafntefli, 25-25, á móti erkifjendum sínum í Haukum á Strandgötunni í dag.

Flestir reiknuðu með nokkuð þægilegum sigri FH sem mætti með sitt sterkasta lið til leiks á móti vængbrotnum Haukamönnum. Sitt sterkasta að undanskildum undradrengnum Gísla Þorgeiri Kristjánssyni sem er enn frá vegna meiðsla.

Haukar eru með tvo leikmenn (Aron Gauta Óskarsson og Leonharð Þorgeir Harðarson) í lengri meiðslum en línumennirnir Pétur Pálsson og Jón Þorbjörn Jóhannesson heltust úr lestinni eftir leik Hauka gegn Aftureldingu í gær.

Sömu sögu má segja um Brynjólf Snæ Brynjólfsson sem er á hækjum í dag og þá var leikstjórnandinn Tjörvi Þorgeirsson einnig frá vegna meiðsla. Haukarnir fáliðaðir þessa dagana.

FH var 14-12 yfir eftir fyrri hálfleikinn en Haukarnir gáfust ekki upp í Hafnafjarðarslagnum og unnu seinni hálfleikinn með tveimur mörkum, 13-11. Lokatölur, 25-25.

FH vann mótið með fjögur stig en liðið gerði jafntefli við Hauka og Aftureldingu en vann sigur á Val í gærkvöldi þar sem Valsmenn voru með á reynslu japanskan landsliðsmann. Meira um það hér.

Haukarnir prófuðu nýja hluti í leiknum í dag en Björgvin Páll Gústavsson, landsliðsmarkvörður, reyndi fyrir sér sem leikstjórnandi þegar Haukarnir spiluðu með tvo inn á línunni. Áhugaverðar pælingar hjá Gunnari Magnússyni, þjálfara Hauka.

Björgvin með í sókninni. Áhugavert #handbolti#hafnarfjarðarmótiðpic.twitter.com/Ovwqipero3

— Vallisig (@Vallisig) August 26, 2017

Björgvin komst ekki á blað en Heimir Óli Heimisson fór fyrir Haukum með átta mörk og Atli Már Báruson, sem gekk í raðir Hauka frá Val á dögunum, skoraði sjö mörk. Báðir voru valdir í úrvalslið mótsins líkt og markvörðurinn Björgvin Páll Gústavsson.

Hægri hornamaðurinn Óðinn Þór Ríkharðsson var markahæstur FH með níu mörk og hægri skyttan Einar Rafn Eiðsson skoraði fjögur mörk.

Þeir voru tveir af fimm FH-ingum í úrvalsliði Hafnafjarðarmótsins 2017 en auk þeirra komust í liðið leikstjórnandinn Ásbjörn Friðriksson, línumaðurinn Jóhann Karl Reynisson og vinstri hornamaðurinn Arnar Freyr Árælsson.

Leikur Valur og Aftureldingar sem átti að spilast í dag fór ekki fram að beiðni félaganna en þau mætast í Meistarakeppni HSÍ á þriðjudaginn í beinni útsendingu á Stöð 2 Sport HD.

Mörk FH: Óðinn Þór Ríkharðsson 9, Einar Rafn Eiðsson 4, Ísak Rafnsson 3, Arnar Freyr Ársælsson 3, Ásbjörn Friðriksson 3, Þorgeir Björnsson 2, Ágúst Birgisson 1.

Mörk Hauka: Heimir Óli Heimisson 8, Atli Már Báruson 7, Halldór Ingi Jónasson 3, Brimir Björnsson 2, Þórarinn Leví Traustason 2, Hákon Daði Styrmisson 2, Andri Björn Ómarsson 1.

Lið mótsins:

Markvörður: Björgvin Páll Gústavsson

Vinstra horn: Arnar Freyr Ársælsson

Vinstri skytta: Atli Már Báruson

Leikstjórnandi: Ásbjörn Friðriksson

Hægri skytta: Einar Rafn Eiðsson

Hægra horn: Óðinn Þór Ríkharðsson

Línumaður: Jóhann Karl Reynisson

Varnarmaður: Heimir Óli Heimisson