Fyrsta lagið á íslensku rauk á toppinn

Lagið Ég vil það með Chase og Jóa Pé hefur verið gríðarlega vinsælt síðan það kom út fyrir tæpum þremur vikum og er á toppi Spotify vinsældarlistans auk þess sem áhorf á myndbandið eru farin að nálgast 80 þúsund á ekki lengri tíma. Chase Anthony er aðeins 18 ára og ekki búinn að vera lengi að – hann gaf út sitt fyrsta lag í október í fyrra.

„Við erum tveir sem byrjuðum þetta saman – ég og Oddur Þórisson. Við hittumst fyrst 24. október til að gera tónlist, við höfðum verið í skóla saman og þekktumst, og svo kom fyrsta lagið þarna 28. október. Eftir það vorum við að vinna saman með skólanum, hægt og rólega. Við erum búnir að gefa út þrjú lög á ensku en núna í sumar prófuðum við að gefa út lag á íslensku. Þá fengum við Jóa með, við vorum búnir að vera góðir kunningjar og gáfum út Ég vil það,“ segir Chase en honum fannst enskan ekki vera að virka neitt og því var ákveðið að skipta yfir í okkar ástkæra og ylhýra – og það virkaði heldur betur vel fyrir þá.

Bjuggust þið við þessum viðtökum?

„Nei, eiginlega ekki, maður býst alltaf við því besta auðvitað – en ég var eiginlega bara „what, hvað er að gerast?!“ Ég var í Bandaríkjunum á meðan á þessu stóð og ég hugsaði með mér „af hverju er ég ekki á Íslandi núna?““

Chase hefur nokkrum sinnum spilað á tónleikum en málsháttur í íslensku rappsenunni er svohljóðandi: „ef þú hefur ekki spilað á Prikinu, hefur þú þá í raun og veru spilað?“. Eða það gæti allt eins verið svona málsháttur.“ Allavega verður Chase með „showcase“ á Prikinu í kvöld þar sem hann sýnir kröfuhörðum Prikurum hvers megnugur hann er og verða þetta hans fyrstu tónleikar í Mekka rappsins á Íslandi – og alveg örugglega ekki þeir síðustu.

Hvað muntu bjóða upp á á Prikinu í kvöld?

„Við erum að gera plötu á Íslensku núna – hún ætti að vera tilbúin í byrjun september. Við ætlum líklega að sýna alveg tvö ný lög á Prikinu á morgun. Jói P verður þarna, ég held að Króli verði líka og auðvitað Oddur. Síðan er möguleiki á að það mæti leynigestur en það kemur auðvitað í ljós á morgun hver það er.“

Tónleikarnir hefjast á Prikinu klukkan tíu en örugglega er gáfulegt að mæta fyrr enda rúmar staðurinn ekki endalausan fjölda.